Royal Greenlandip Polenimi aalisakkerivissaarsuani ammarpaa

Suliffeqarfissuup Royal Greenlandip Polenimi illoqarfimmi, Koszalinimi aalisakkerivissaarsuani pisortatigoortumik ullumi ammarmagu, Piniarnermut Aalisarnermullu naalakkersuisoq, Finn Karlsen najuuppoq. Aalisakkerivik januaarimili aallartikkaluartoq pisortigoortumik ullumi aatsaat ammarneqarpoq.
juunip 04-at 2008 06:33

Aalisakkerivissuaq 27.000 kvadratmeterisut angitigivoq, tassa arsaattarfittut arfineq marluttut angitigaluni, Europamilu aalisakkeriviit annersaannut ilaalluni.

Aalisakkerivimmi suliarineqarsinnaasut suliarisinnaaniarlugit aalisakkat nunani allani pisarineqarsimasut ilanngullugit suliarineqartassapput. Assersuutigalugit suluppaakkat Danmarkip kitaata imartaani pisarineqartassapput, Polenimiit oquuttat, Svalbardillu eqqaani Barentshavemiit saarulliit pisarineqartassallutik. Nataarnat allallu aalisakkat Kalaallit Nunaanni kilisaatinit allanillu aalisariutinit pisiarineqartassapputtaaq.

Koszalinimi aalisakkerivimmi 200-nik sulisoqarnissaa naatsorsuutigineqarpoq. Illoqarfillu minguitsutut Polenimi tusaamaneqarmat aamma Royal Greenland mingutsitsiniarani aamarsuit atornagit uumassusilinniit gassi atorlugu aalisakkerisitsisassaaq.