Royal Greenlandip nunaqavissut salliutissavai
Anthon Frederiksen, Qasigiannguit kommuneaniit ippassaq oqariartortoqarpoq, Ilulissat kommuniat suleqatigiinnerup anersaavanik pigisaqarani, Royal Greenlandip avataaniik sulisussanik tikisitsinissaminut qinnuteqaataa akuerisimagaa, tamanna isumaqatigaajuk?
-Naamik
Qanoq?
-Tassa soorunami kommunalbestyrelse aaliangernermini, nunatsinni suliffissarsiuussisarnermi inatsit tunngavigalugu aaliangerpoq, tassa imaappoq, soorunami nunatsinni suliffissaaleqisut pissarsiariniaqqaanissaat taanna siullitinneqartussaavoq, taava pissarsiarineqarsinnaanngippata, periarfissanik allanik ujaarlertoqarnissaa taanna kommunalbestyrelsep taanna isummerfigivaa.
Taava Qasigiannguit Kommuneat eqqarsaatiginikuuarsi?
-Soorunami, soorunami
Tassanngaanniik sulisussanik atorfissaqartitsisinnaassuisi?
Ilaanarujussuaq, tikilluaqquneqakuttoorujussuassapput, qasigiarmiut Ilulissanut suliartorniarunik, Ilulissani borgmesteri Anthon Frederiksen oqarpoq.
2008-mut inatsisartut aningaasanut inatsisissaannut siunnersuummi, nuuttarnerulersitsiniarluni tapiissutitut aningaasaliissutit 3,8 millioni koruunit immikkoortinneqarput.
Taperneqarsinnaasullu ilaatigut tassaapput, nuuttut ornitaminni ataavartumik suliffeqalernissamik neqeroorfigineqartut, sulisussatullu piumaneqarnerminnik uppernarsaasinnaassut.