Royal Greenlandip namminersortunngorsarnissaa isumassarsiatsialaavoq

Suliffeqarfiit suli pisortanit pigineqartut namminersortunngorsarnissaat Naalakkersuisut siunnerfigissappassuk, isuma pitsaasuuvoq, Naalakkersuisut suliffeqarfinnik amerlanernik namminersortunngorsaanissamik isummernerannut atatillugu, Royal Greenlandimi pisortaasimasoq Keld Askær taama oqarpoq.
oktobarip 15-at 2009 11:38

- Suliffeqarfiit namminersortut namminneerlutillu ingerlasinnaasut namminersortuuinnartinnissaat tunngaviusumik isumaqarfigaara. Suliffeqarfiit namminersortut suliffeqarfimmut aningaasalersuisinnaanerat aallartisissinnaagaanni tamanna atorlugu namminersortunngorsaaneq inuiaqatigiinnut malunnaateqarpianngitsumik ingerlanneqarsinnaavoq.

Piffissap ingerlanerani Royal Greenlandi tamakkiisumik ilaannakuusumilluunniit tuniniarneqassappat, suliffeqarfimmik pisiumasinnaasup suut eqqarsaatersuutigissagai ilimagaajuk?

- Suliffeqarfiup ingerlatsiviginissaani periarfissaritinneqartut suuneri, naalakkersuinikkut suliaqartunut attuumassuteqartoqarnersoq, taamaattoqassappallu qanoq annertutigisumik taamaattoqarnersoq, tamakku suliffeqarfiup unammillerluni niuernermik ingerlatsineranut aalajangiisuulluinnartarmata, pisisussamit eqqarsaatersuutigineqassasut isumaqarpunga.

Royal Greenland suliffeqarfittut soqutiginaateqartutut pisisinnaasunit isigineqarsoraajuk?

- Aap, Royal Greenland soqutigineqarsoraara, nunarsuarmili aningaasarliornerup pilersitaanik soqutigisallit namminersortuunersut pisortaneersuunersulluunniit immikkoortikkuminaapput. Taamaammat suliffeqarfiit sorlernulluunniit attuumassuteqaraluarunik, annertusaanissamik periarfissat misissuiffigisariaqarpaat, taamaammat Royal Greenlandip ilaanik soqutiginaateqartitsisunik suliffeqarfinnik peqassaaq, Keld Askær oqarpoq.

Keld Askær Royal Greenlandimi 2001-imiit 2006-imut pisortaavoq. Ullumikkut siunnersortitut sulivoq siulersuisunullu akissarsiaqarluni ilaasortaalluni.