Royal Greenlandip namminersortunngorsarneqarnissaa Sulisitsisut Peqatigiiffiata piumasaraa
Tassami naalakkersuisunik nutaanik qinersisoqartorlu piginnittut taarserneqartarnerat pissutigalugu, siumut pilersaarusiornissaq ajornakusoortarmat.
- Royal Greenland namminersortunit pigineqaleraluarpat tamanna kalaallinut aalisarnermik inuussutissarsiutilinnut tamanut iluaqutaassagaluarpoq, inuiaqatigiinnimmi pigineqartillugu tamanna pisinnaanngimmat. Niuernissamut siumut pilersaarusiorniarneq aamma ukiut sisamakkaarlugit - akulikinnerusumilluunniit - qinersisoqartartillugu - ajornakusoorpoq.
Sulisitsisut Peqatigiiffianni pisortaq, Henrik Leth, Nunat Atlantikup Avannaaniittut Aalisarneq pillugu sapaatip akunnerani kingullermi Aalborgimi ataatsimeersuarmata taama oqarpoq.
Kattuffiit apeqqummi matumani avissaartuussimapput. KNAPK-p, Royal Greenlandip namminersortunngorsarneqarnissaa kissaatigaa, taamaaliornikkut tunisinermi akit qaffassasut neriuutigineqarmat.
Kisianni Sulinermik Inuussutissarsiuteqartut Kattuffiata, SIK-p, ernummatigaa, Royal Greenland namminersortunngoraluarpat tunitsiviit matoorarnissaat, tamakkumi aningaasatigut tapiiffigineqarnatik ingerlasinnaanngimmata, tunitsiviillu matoorassappata suliffissaaruttorpassuaqassammat.
Royal Greenlandimiit oqaaseqartitsiniaraluaratta iluatsinngilarput.
