Royal Greenlandip Kommuneqarfik Sermersooq suleqatigilerpaa

Illoqarfiit tunitsiveqarfiusut ilaanni suliffissaaleqisoqaraluartoq, tunitsivinni aamma sulisussaaleqisoqartarnera iliuuseqarfiginiarlugu Royal Greenland Kommuneqarfik Sermersoorlu isumaqatigiissusiorput:

- Sulisoqarniarnerup tungaatigut ilaatigut tunisassiorfitsinni sulisunik amigaateqartarpugut. Suliffissarsiuussisarfik qanimut suleqatigereerparput, kisianni suleqatigiinneq taanna suli nukittorsaqqissinnaavarput, Royal Greenlandimi sulisoqarnermut pisortaq Søren Olsen Damgaard oqarpoq, nangillunilu:

- Kommunit, soorlu Kommuneqarfik Sermersooq, illoqarfinni assigiinngitsuni suliffissarsiuussisarnermik allaffeqarput, tassanilu sulisut innuttaasut qanimut soorunami malinnaaffigivaat kikkut sulinissaannut piukkunnarsinnaanersut, kikkullu immaqa piukkunnarpallaanngitsoq massakkorpiaq. Piukkunnartullu piareersimasullu uagut soorunami sulisorerusuppavut, Søren Olsen Damgaard oqarpoq.

Illoqarfiit ilaasa suliffissaaleqisoqarneranik eqqugaasimagaluartut, tunitsivinni aamma sulisussaaleqisoqartarpoq, tamannalu aamma iliuuseqarfigineqalersaarluni:

- Illoqarfiit ilai annertuumik suliffissaaleqisoqarfiusut, uagullu sulisunik amigaateqarluta, tamanna soorunami naapertuuppallaanngilaq. Taamaammat aamma taakkua suliffissaaleqisut sulinissamut piareersarnissaat suliniaqataaffigerusupparput, Frederik Olsen oqarpoq.

Illuatungeriit ataatsimoorlutik sulisussanik qulakkeerinninnissaasa saniatigut, suliffeqarnermi suliffissaqartitsinermilu ilisimasatik atorluarniarlugit, Royal Greenland aamma Kommuneqarfik Sermersooq suleqatigiinnerunissamut isumaqatigiissusiorput.

Sulisut piginnaanngorsaqqinneqarnissaat, sulisut ilinniarnerminnut atatillugu suliffimmik misiliisut ikorfartorneqarnissaat, sulisut sulisoriinnarnissaannut assigiinngitsutigut iliuuserisassat assigisaallu, illuatungeriit isumaqatigiissutigaattaaq, tassalu sulisussaqarniarneq matumani isumannaarniarneqarluni:

- Sulisunik amigaateqaraangatta uagutsinnut pitsaanngitsumik soorunami kingueqartarpoq, aalisakkat suliassaagaluartut suliarineqarsinnaaneri tassani killeqartarpoq, taava neriuppugut suleqatigiinneq una aallartilluariarpat sulisussaaleqisarneq ilaatigut pisartoq taanna annikillisarsinnaassallutigu, Royal Greenlandimi sulisoqarnermut pisortaq Søren Olsen Damgaard, oqarpoq.