Royal Greenlandip kajumissaaruteqarnera aalisartunit akerlilerneqarpoq

Nuup eqqaani qaleraleqassuseq qeeraqassuserlu aalisartunut akilersinnaanngilaq, saarulleqarluarnerali atorluarusullugu saarullinniaannarusupput, Nuummi Aalisartut Piniartullu Peqatigiiffianni siulittaasoq Johannes Egede oqarpoq,

- Aalisartut qaleralinniarnissamut akuersissuteqarunik qaleralinniarsinnaapput,

kisiannili aalisartut tamarmik qaleralinnialissagaluarpata, peqassuseq ima annertutiginngilaq qaleralinniarneq imminut akilersinnaalluni, Johannes Egede oqarpoq. Ukiuni kingullerni 20-ni Nuup eqqaani aalisarneqanngillat, qalerallit nungutaangajannikuunerat pissutaalluni Nuummi aalisartut piniartullu peqatigiiffianni siulittaasoq oqarpoq. Nuummi aalisartut qeerarniarnissaanik Royal Greenlandimit aamma kajumissaarneqarput. Tamanna pillugu Johannes Egede oqarpoq, aalisartut aalisariutiminni qeerarniarnissamut atortunik allanngortiterisaqarlutik. Qeeraqassuseq annertusiartoraluartoq, qeerarniarsinnaaneq aalisartunut iluanaarutaasinnanngitsoq, Johannes Egedep oqaatigaa.

Peqatigiiffiup piumasaraa KNAPK, Royal Greenland, Aalisarnermut Piniarnermullu naalakkersuisoq kiisalu Kommuneqarfik Sermersooq aalisartut peqatigalugit ataatsimiititsissasut, ajornartorsiut aappaagumut qaangerniarneqassammat