Royal Greenlandip isumaliutersuutaa SIK-mit isumaqatigineqarpoq
Royal Greenland-imit isumaliutersuutigineqarpoq, suliffeqarfissuaq iluanaarnarnerulersinniarlugu siunissami aalisakkerivimmi sulisut ikilisarneqarnissaat. Tamanna SIK-mit isumaqatigineqarpoq.
Nunarsuarmut siuaruarterineq Europa-llu kangiani Asiamilu nunanut akissarsiakiffiusunut unammillerneq pissutigalugit, ukiuni kingullerni pisariillisaanermik teknikkikkullu aaqqissuuteqartarnernik kinguneqartarsimavoq, piffissarlu ungasinnerusoq eqqarsaatigalugu aalisakkerivinni sulisut ikilisarneqarnerinik kinguneqarsinnaasoq suliffeqarfissuup pisortaanera Keld Askjær-ip Kangerlussuarmi inuussutissarsiorneq pillugu ataatsimeersuarnermi saqqummiukkai, Sermitsiami AG-milu atuarneqarsinnaavoq.
Ikilisaasoqarnerani naatsorsuutigineqarpoq sulisorisat akissarsiatigut sulinermilu atugarisaat pitsaanerulernissaat, soorlu iluanaarutisisalernikkut, feriarnerit akilerneqartalernerinik, aalisagaqannginneranilu angerlartinneqartarunnaarnermik.
Isumaliutersuutit SIK-mit taperserneqarput.
-Suliffiit ikinnerusut akuerisinnaavagut, sulisorisat atugarisaat pitsaanerulissappata, SIK-p siulittaasua Jess- G. Berthelsen oqarpoq.
-Qaammatit sisamat matuma siornatigut Royal Greenlandilu eqqartorsimavarput, ilaatigut periarfissatut taasimallugu. Ullumikkut Royal Greenland-imi amerlasuut suligaluartut maanaannaq angerlartitsinerit annertuumik pisarput. Taamaalilluni ukiumut tiimit Royal Greenlandimi atortagaat amerlagaluarlutik ikittuararsuusarput.
Taamaattumik periarfissat ilagisinnaavaat sulisut ikinnerusut, kisiannili ukioq kaajallallugu sulisartut. Aamma tamanna sulisartunut naammaginarnerussaaq, minnerunngitsumik ilaasortagut eqqarsaatigalugit, Jess G. Berthelsen oqarpoq.
Jess G. Berthelsen-illumi siunissami suliffissaaruttussat ernumatiginngilai.
-Pingaaruteqarpoq ilaasortatta pikkorissartinneqarnerisa kingunerisaanik, ilaatigut aatsitassarsiornerup ataani sulilersinneqarsinnaanissaat, imaluunniit sanaartornerup iluani. Imaluunniit allanut ilinniarteqqinneqartarnissaat uagutsinnut pingaaruteqartorujussuuvoq, taamalillutik suliffissaaleqinatik nunatsinni aamma ingerlasinnaaniassammata, Jess G. Berthelsen oqapoq.
