Royal Greenlandip aningaasarliornera ilisimaneqareersimavoq

Royal Greenlandip Namminersorlutik Oqartussanit milliardit affaanik siorna aasakkut aningaasaliiffigineqarneranut atatillugu pisut misissorneqarnerannut nalunaarusiami ilaatigut taama inerniliisoqarpoq.

- Taamaalillunga uanga paasinninnera unaavoq, tassalu taamanikkut Naalakkersuisunut ilaasortat inaarutaasumik aalajangiinissartik ukiup affaa missiliorlugu sioqqutsisumik Namminersornerullutik Oqartussat Royal Greenland A/S-imik piginnittutut saniatigut aningaasaliisariaqarnertik ilisimareersimagaat, soorluttaaq nassuiaatip naammassillugu suliarineqarnissaa sioqqullugu suleqatigiissitaliat inassutissatut missiliuussaat taamanikkut Naalakkersuisunut ilaasortat susassaqartut ilisimasaqarfigereersimagaat, Naalakkersuisut siulittaasuat Kuupik Kleist Inatsisartunut nassuiaammi ilaatigut allappoq.

Royal Greenlandip aningaasatigut ajornartorsiuteqarnera Naalakkersuisut 2008-mi novembarimi ilisimareeraat nassuiaammi taamaasilluni ersersinneqarpoq.

Ingerlatseqatigiiffiup aningaasaqarnera ilorraap tungaanut sangutinneqartariaqartoq, Royal Greenlandip siorna januaarip 27-anni ataatsimeersuarnerani Finn Karlsenip piginnittut sinnerlugit oqaaseqartoq, nassuiaammi aamma taakkartorneqarpoq.

Siornatigut naalakkersuisunut siulittaasuusimasup Hans Enoksenip aalisarnermullu naalakkersuisoqarfimmi pisortaasimasup Amalie Jessenip, Royal Greenland pillugu oqaasii taamaalillutik uppernarsineqarput, Royal Greenlandip aningaasarsiornikkut ajornartorsiuteqarnera pillugu Finn Karlsenip ilisimasimasaqarsimanera uppernarsineqarluni.

Royal Greenland pillugu suliami naalakkersuisuusimasup Finn Karlsenip oqaasii taamaasillutik naapertuuttutut nalilerneqarsinnaanngillat, taamanikkut, tassa siorna juulip ulluisa qulinganni ima oqarami:

- Arlaleriarlunga apeqqutigaara pisortaanermut Peter Schultzimut aamma Ingerlatseqatigiiffinnut Allaffimmi atorfilittanut, Royal Greenlandip aningaasarliornera sooq uannut isertuunneqarsimanersoq. Imminut qiviarput akinatillu, Finn Karlsen taamanikkut taama oqarpoq.

Naalakkersuisut Royal Greenlandimut aningaasaliisariaqarnerannut misissuiniarnerat Finn Karlsenimit ukioq manna apriilimi ilassilluarneqaraluarpoq.

Aalisarnermut naalakkersuisuusimasoq Finn Karlsen sapaatip-akunnerata naanerani oqaaseqartissinnaassallugu neriuutigaarput.