Royal Greenlandimit nalunaarusiaq isorineqarpoq
Raajarniarnermut tunngasunik nalunaarusiartik Namminersornerullutik oqartussat saqqummiuteqqammmerpaat tassanilu saqqummiuneqartut pillugit Royal Greenland tusarniaaffigineqartoq suli akissuteqarsimanngilaq.
Aalisarnermut tunngasumik nalunaarusiamik nutaamik Namminersornerullutik Oqartussat saqqummiussipput, nalunaarusiaq ilaatigut imaqarluni sinerissamut qanittumi raajarniarnermi raajartanut ooqanngitsunut sikulersukkanut 2004-mi tapiissuteqartoqarsimaneq. Tapiissuteqarneq raajanik tulaassuiffimmit Royal Greenlandimit allaffissornikkut aqunneqarsimavoq. Tapiissutit raajartallu tulaanneqartut annertussusaasa qanoq imminnut naapertuutsiginerat Namminersornerullutik Oqartussanit misissorneqarpoq, tassanilu paasineqarluni tapiissutit atorneqarnerat tulaassallu annertussusaat imminnut naapertuutinngitsut. Tamanna pillugu suliffeqarfissuaq Royal Greenland tusarniaaffgineqarpoq, tusarniaassummulli suli akissuteqarsimanani.
-Isumaqarpugut nalunaarusiaq atorsinnaanngilluinnartoq, sukumiisumilli misissortinniarparput. Nalunaarusiami taakkartorneqartut eqqarsaatissagaanni, soorunalimi arlaatigut kukkusoqartarsimanissaa mattussinnaanngilarput, taamaattoqarsimassappalli suliffeqarfiup iluani kinguneqartitsisoqassaaq, Royal Greenlandip pisortaanera Keld Askær, Namminersornerullutik Oqartussat raajarniarnermut atatillugu nalunaarusiaat saqqummeqqammersoq pillugu taama oqaaseqarpoq.
Royal Greenlandip tusarniaassummut akissuteqartinnani, nalunaarusiami saqqummiunneqartoq, tassa raajartat qaqinneqarnerminniit nunamut tulaanneqarnerminnut oqimaassusaasa assigiinngissuteqartarsimanerannik paasisaq inatsisilerituuminnut aningaasarsiornermullu naatsorsueqqissaartartuminnut misissoqqissaarteqqaarniaraa, Keld Askær ilisimatitsivoq.
Namminersornerullutik Oqartussani Aalisarnermullu Piniarnermullu pisortaqarfiup nalunaarusiaani ilaatigut saqqummiunneqarpoq pisassiissutinit ilanngaassinerit nalunaarsorneqanngitsut atorunnaarsinnerisigut raajarniarmi pisat annertussusaat 8500 tonsit missaannik appariassasut. Tassanilu avataasiorluni aalisarneq ikilileriinermik annertunermik misigisaqassassoq.
