Royal Greenlandimi sulisut isumassarsiaq nuannarivaat

Pujortarunnaarlutillu sanigorsarit. Taama Royal Greenland sulisuminut 2300-juusunut neqerooruteqarpoq. Inooriaatsimik peqqinnartumik atugaqalernissamik aalisakkanik tunisassiorfik, sulisuminut peqqinnissamut isumaqatigiissusiorpoq, taassumalu saniatigut sulisut misigisaqarlutillu pinnatassaqartassapput. Sulisut akornanni neqeroorut tapersersorluarneqartoq Inger Jerimiassen, Sisimiuni sulisut sinniisaat oqarpoq:

-Isumaqarpunga amerlanerit tapersersoraat. Sanigorsarnissaq eqqarsaatigalugu ullaat tamaasa eqaarsaartaarneq aallartinnikuugaluarpoq, massakkulli unittooqqalaarunarput amerlanerilli aallarteqqinnissaat kissaatigaat, Inger Jerimiassen oqarpoq. Ilanngullugu oqaatigaa nammineq pualasuujugami sanigorsartut malinnaaffigissallugit, pujortarnerli ajornerami taakku peqataaffiginissaat pisariaqanngitsoq.

Sisimiuni suliffissuup matoqqanerata nalaani aasaq sulisut pikkorissartinneqarput, ilaat inuttut ineriartorneq sammillugu ilaallu arpatsinneqartarlutik. Inger Jerimiassen isumaqarpoq, suliniut aallartereerami sulisut taamaalillutik sanigorsarnissaminnut pujortarunnaarnissaminnullu piareersarneqalereersut.

-Suliffeqarfitta taamatut iliuuseqarnera assut ajorinngeqaara. Siornatigut ulapitsitaajuaannarpugut arlaannillu susoqalaassanani. Kisianni massakkut pissutsit tamakku eqqussuunneqarnerini akuutsitaanerput assorujussuaq peqataaffigilluartarparput, tassalu suliffik kajumerineqarnerulerluni, Inger Jerimiassen oqaluttuarpoq.

Inger Jerimiassen isumaqarpoq Royal Greenlandip sulisunut suliniuteqartarnera sulisunut ajunngitsumik kinguneqartartoq, sulisut takkuttuartaramik.