Royal Greenlandimi soraarsitsiortulersut

Royal Greenland-ip Danmark-imi immikkoortortaqarfiisa ilaat amigartoorutaasumik ingerlavoq.
novembarip 05-at 2012 10:40

Taamaattumik suliffeqarfissuarmi sulisut 30 soraarsinneqarnissaat ilaasalu allamut nuunneqarnissaat nalunaarutigineqarpoq.

Royal Greenland-ip pisortaata Mikael Thinghuusip oqarnera malillugu,  Royal Greenland-ip Glyngør-imi immikoortortaqarfia raajanik lage-kkannik tunisassiorfiusoq iluanaarutaanngitsumik ingerlammat taanna matuneqartussangortoq.

Royal Greenland-ip Glyngøre-mi tunisassiorfia matuneqartussanngorpoq.

Tunisassiorfimmi  sulisut 65-usut affaat soraarsinneqartussanngorput, sinneri Royal Greenland-ip Aalborg-imi immikoortortaqarfiani sulilernissaannut neqeroorfigineqassapput.

Immikkoortortaqarfik taanna iluanaarutaasumik ingerlasinnaangimmat matuneqartariaqarsimasoq Royal Greenland-imi pisortaq Mikael Thinghuus oqarpoq. 

Glyngøre-mi tunisassiornermi aningaasat qanoq amerlatigisut annaaneqarsimanersut  pisortap oqaluttuarisinnaanngilaa.

Taassuma uppernarsarpaa, Glyngøre-mi sulisut 65-usut affaat soraarsinneqassasut, affaallu immikkoortortanut iluanaaruteqarfiusunut nuunneqarumaartut.

Glyngøre-mi immikkoortortaqarfip ataannarnissaa Royal Greenland-imit sivisuumik ilungersuutigineqarsimasoq direktøri oqarpoq.

- Glyngøremi tunisassiorfik Royal Greenland-ip tunisassiorfiinut allanut sanilliullugu aningaasattigut annaasaqaatigisimasavarput, Mikael Tinghuus oqarpoq.

- Immikkoortortaqarfimmi tassani tunisassiornerup ingerlallualernissaanut  
ukiumi kingullermi ataatsimi affarmilu suliniuteqartoqarpoq iluatsittumik aammalu siuariartorfiusumik,  immikkoortortamullu tassunga nukippassuit atorneqarput  taamaattorli imminut akilersinnaasumik ingerlalersinnaanera iluatsissinaanngimmat taamatut aalajangertariaqarsimavugut, Mikael Thinghuus oqarpoq.

Tunisassiornermi aningaasartuutit aalajangersimasut amerlapput, aningaasartuutillu matussuserniarlugit annertuunik tunisassiortoqartariaqarsimavoq, Mikael Thinghuus oqarpoq, raajat lage-kat amerlavallaartut tunisassiarineqarput, taakkulu iluanaarutaasumik tunineqarsinnaasimanngillat tunineqarnerinut akit appasippallaarmata, Royal Greenland-ip direktøria oqarpoq.