Royal Greenlandimi pisortaaninngortussaq oqallisaavoq

Namminersornerullutik Oqartussat suliffeqarfiutaanni, Royal Greenlandimi, kina pisortaaninngussanersoq eqqarsaatigineqartorujussuuvoq, naak aternik saqqumisoqanngikkaluartoq. Pisortaaninngortussarli kalaaliussanersoq danskiussanersorluunniit oqallisaavoq.

Siumup Inuusuttunut suleqatigiiffia, SIS, tusagassiutinut nalunaaruteqarluni allappoq, Royal Greenlandimi pisortaanissaq kalaaleq ilinniagaqarluartuuginnarnani aamma nunarsuarmi niueqatigiinnermik ilisimasaqarluassasoq.

- Kalaalinngorsaanerup iluani atorfik kalaallimut taamaattumut atorfigitissallugu tulluartuuvoq, ilaatigullu eqqaasariaqarpoq nunarsuarmioqataanitsinnut kalaallimik atorfinitsitsinissaq nunatsinnik nittarsaassinerussasoq annertoorujussuaq, Siumut Inuusuttunut Suleqatigiiffiata, SIS-p siulittaasua, Mads Petersen, allappoq.

Siumup Inatsisartunut Folketingimilu ilaasortaatitaa, Lars-Emil Johansen, siusinnerusukkut oqarpoq, Royal Greenlandimi pisortaaninngortussaq kalaaliussasoq.

Royal Greenlandimi pisortaaneq, Keld Askær, ukiup naalernerani tunuartussaavoq, siulersuisullu nalunaarutigereerpaat piukkunnarnersiuisartut piginnaaneqarluartumik nassaarumaartut.