Royal Greenlandimi isumalluartut
Ullumi ulloqeqqanut radioaviisi Royal Greenlandip ukioq manna ukiup affaani siullermi aningaasatigut kaaviaartitai pillugit tusagassiami oqaatigingaluarparput Royal Greenland 40 million koruuninik amigartoortuteqarsimasoq, tamannali eqqunngilaq, kukkunerlu utoqqatsissutigaarput.
Tassalu eqqortoq unaavoq, ukiup affaanoortumik naatsorsuiffimmi siullermi piffissami 2004-imi oktoberip aallaqqaataaniit 2005-imi marsip naaneranut Royal Greenland A/S sinneqartooruteqarmat akileraartigani 39 million koruuninik.
Ukiulli naatsorsuusiorfiup aallartinneraniit Royal Greenland A/S-ip niuerfiini aningaasat nalingisa appariarnerisigut naatsorsuutigineqarpoq iluanaarnerussutissaagaluit 40 million koruunit missaaniittut.
Tassa aningaasat nalingi nikissimanngitsuuppata sinneqartoorutit ukiup affaani siullermi 79 million koruuniusimasussaangaluartut, Royal Greenlandip siulersuisuini siulittaasoq Paaviaaraq Heilmann ilisimatitsivoq.
- Maannamut angusat aallaavigissagaanni aammalu apriilimi niuernermi pisut tunngavigissagaanni ukiup naatsorsuiffiusup ilivitsup, tassa 2004-imi oktobarip aallaqqaataaniit ukioq manna septemberip naanissaata tungaanut naatsorsuutigineqarpoq sinneqartoorut ukiumoortumik naatsorsuiffimmi kingullermi angusat assigissagaat, tassalu akileraartigani sinneqartoorutit 120 million koruunit missigissagaat, Paaviaaraq Heilmann taama ilisimatitsivoq.
