Royal Greenlandimi ajunngitsorsiat amerlagineqartut

Tamanna aalisartunit aalassassimaarutigineqarpoq.

Suliffeqarfimmi pisortat soraarmata 14 millioni koruuninik tuninagit aningaasat aalisartunut tunniunneqartariaqaraluarput aalisartoq tunisaminik iluanaaruteqarsinnaanani ilungersortoq, Willliam Jakobsen, oqarpoq

14 millioni koruninik ajunngitsorsiassanik tunineqarnerat ingasappallaaqaaq, uagut taakkua atorfissaqartikkaluarpavut, allaffimmi sulisut qilerniusallit tunioraannarnagit, William Jakobsen oqarpoq. Royal Greenlandip sinneqartooruteqarani ingerlanera William Jakobsenip tupiginngilaa, tassami ukiuni siuliini amigartooruteqarlutik aamma ingerlatsimmata.

Sinerissap qanittuani aalisartut aalisakkat tunisaat akiluttorput, Royal Greenland tunisaqarnermigut sinerissap qanittuani aalisartunit akilersorneqarpoq, ukiorpassuarni aamma Royal Greenlandip aalisartunit akilersorneqarnissaa, William Jakobsenip naatsorsuutigaa.

Taassuma aalisartutut Royal Greenlandimullu aalisakkanik tunisisartutut suliffissuup namminersortunngorsarneqarnissaa kissaatigaa. Royal Greenlandip aggulullugu piginneqatigiiffinngortinneqarnissaa kissaatiginartippaa, inuiaqatigiit akissaajarnerat naammalermat, William Jakobsen oqarpoq.

Aalisartut ilaat, Johannes Egede, aamma aalisariutaatilik, aalisakkanik pisaminik Royal Greenlandimut tunisissaarluni suliffeqarfimmut Romark Seafoodimut tunisisalersimasoq, ima oqarpoq:

- Pisortat soraarneranni ajunngitsorsiassanik 14 millioni koruuninik tunineqarnerat ingasappallaarujussuarpoq, pingaartumik aalisakkat akii taama appasitsigitillugit.