Royal Greenland Tysklandimi sualeriffittaarpoq
Suannik tunisassiornerit Royal Greenlandip Westfalia-Strentz-imi ingerlatai Islandic Seafoodimit pisiarai.
-Tunisassiornermut atortut sulisullu inuit qulit kingornuppavut tunisassiorfillu umiarsualivimmi inissisimasoq attartorlugu, tunisassiallu taamatut ingerlaannassapput, Royal Greenlandip pisortaanera Flemming Knudsen ilisimatitsivoq.
Tunisassiorfiup pingaarnertut nipisat suaat igalaaminernut poortuussat ingerlappai, RG-lu ukiuni arlaqartuni nunatsinneersunik nipisat suaannik kisimi Cuxhavenimiittumut fabrikkimut pilersuisuuvoq.
Royal Greenlandip pisineranut tunuliaqutaavoq pisuussutip pisareqqaarneraniit, tunisassiarineranut tunineranullu piginnittuulernissaq. Siornatigut affaannarmik naammassillugit tunisassiornermi (halvfabrikataliornermi) RG Nunarsuarmi tunisassiortuni annerpaavoq, taakkuninngalu tunisassiorneq nunatsinni angerlarsimaffeqarpoq.
- Tunisassiorneq tamaat nakkutigisinnaanngussavarput namminerlu naammassillugu tunisassiarilissallgu, taamaalioruttalu suannik tunisassiorneq isertitsissutiginerulissavarput, pisortaaneq oqarpoq.
Cuxhavenimi ingerlatat pisiarinerannut ilanngullugu paasisimasat aamma ukiorpassuarni suannik tunisassiornermi misilittakkat pissarsiarineqassapput.
- Nunarsuarmi atortut pitsaanerpaat nutaaliaanerpaallu atortorilissavavut aamma tunisassiornermut tamarmut piginnittuulernermut atasumik RG pisisartut amerliartuinnartut tamakkiisumik aamma qanimut attavigisinnaanngussavai, Flemming Knudsen oqarpoq.
