Royal Greenland tunniutiinnarusunngilaq

- Iluaqutaanavianngilaq, aamma tunniusinnaallugit neqeroortutigisinnaasagut saqqummiutereerpagut.

Sinerissap qanittuani aalisartut, ilaatigut nipisaat suaannik qaleralinnik saattuanik aalisakkanillu allanik aalisartut Royal Greenland-imut tunisiumajunnaaqataanerannut atatillugu, Royal Greenland-ip pisortaa Henrik Leth radioavisimut taama oqarpoq.

- Suliffissuaatitta suliassakinnerulernerannik tamanna kinguneqassaaq, sulisullu suliassaarutissappata, taava sulisut angerlarartiinnartariaqassavagut, Henrik Leth oqarpoq. KNAPK-p taamatut alloriaqqinnera iluaqutaanavianngitsoq Henrik Leth oqarpoq.

Sapaatit-akunnerini pingasuni tunisiumajunnaarneq ingerlanneqareerpoq, Royal Greenland-illu neqeroorutigisinnaasai killeqartut pisortaq erseqqissaavoq.

Ukiuni kingullerni arlaqalersuni aalisartut atugassai ajorneruleriartorsimapput, ilaatigut uuliap akiata qaffakkiartuinnarsimanera pissutaalluni. Isumaqatigiinnginnermullu pissutaavoq, raajat akii. KNAPK-p piumasaraa raajanut ukiumut tunineqartartunut aningaasat 215 millioni koruuniunissaat, Royal Greenland-illu taamaallaat 208 millioni koruunit tunniussinnaallugit nalunaaruteqareerpoq.

Arctic Green Food-imut tunisineq unitsinneqanngitsoq Nuummi aalisartut piniartut ilaqutaasalu peqatigiiffiani siulittaasoq NAPP-mi siulittaasoq Lars Mathæussen oqarpoq.