Royal Greenland tuniniaasinnaajunnaarsinnaavoq
Meqqilersuut MSC aalisakkanik tunisassiortunit pilerigineqaraluttuinnarpoq. Imaasiallaannarli pissarsiarineqarsinnaanngilaq. MSC pissarsiarissagaanni ilaatigut biologit innersuussutaat malillugu aalisartoqartoq uppernarsarneqartartussaavoq. Taamaammat ukiut marlussuit qaangiuppata biologit innersuussutaat qaangerlugu pisortat pisasseeqqissagaluarpata iluarineqassanersoq Royal Greenlandip nunatta ingerlataani pisortaanut Paaviaaraq Heilmannimut apeqqutigigatsigu ima akivoq:
”Pisassiinerit tunngaviusumik pisassiissutaappata imaluunniit pisassiinerit ilassutaappata taava biologit inassutaanninngaaniik annertuumik nikingappata taava uagutsinnut, tamatsinnut ajoqutaasinnaavoq siunissami.”
MSC malillugu biologit pisassiissutaat malinneqartussaavoq kiisalu aqutseriaaseq tunisassioriaaserlu ersarissoq atorneqassaaq atortullu avatangiisinut innarliinngitsut atorneqartut uppernarsarneqassalluni. MSC atulinngikkaanni tamanna aalisakkanut raajanullu tuniniakkanut qanoq sunniuteqassava?
”Meqqilersorneqanngikkunik tunisassiagut taava tuniniarneri ajornarnerulersinnaassapput aammalu akitigut pissarsiarisinnaasagut appasinnerulersinnaanerat aamma annilaanngatigisinnaavarput.” Paaviaaraq Heilmann oqarpoq.
