Royal Greenland sulisussaaleqivoq

Royal Greenlandip fabrikkiini maanna sulisorisat saniatigut inuit 120-150-amigaataapput.

Narsami suliffissuarmi 30-nik amigaateqarput, Sikorsuilli tammarnissaat aalisalernissamut apeqqutaasoq oqaatigalugu.

Nuummi 20-t Qeqertarsuatsiaanilu arfineq-pingasut. Kangaatsiami qulit, Qasigiannguani 30-t, Ilulissani 35-t, Uummannami 20-t Ikerasammilu qulit.

Sulisussaaleqinerup aalisaleruttorfimmi nioqqutissiorsinnaassutsimut aalisartunillu kiffartuussinermut pitsaanngitsumik sunniuteqarsinnaanera Royal Greenlandip assut ernumassutigaa. Ilisimaneqareermat ukiuni arlalinngortuni sulisussat naammattut pissarsiarineqarsinnaanngitsut malitsigisaanik Royal Greenland tamakkiisumik nioqqutissiorsinnaasarsimanngitsoq, soorlu siorna 2007-imi taama pisoqartoq.

Ukiormanna pissutsit allaanerunavianngitsut Royal Greenlandip ernumassutigaa.

- Tulaassuisunut killilersuinissaq atorusunngeqaarput tunisat tamaasa nioqqutissiarisinnaagatsigit aammalu saarulliit, qalerallit raajallu tunineqarsinnaasut tamaasa atorfissaqartikkatsigit. Sulisussaaleqinerulli allatut iliortariaqalersissinnaavaatigut, pisortaq Pâviâraq Heilmann oqarpoq.

Royal Greenland oqartussanik assigiinngitsunik suleqatiserinnittarsimavoq, aaqqiissutissat ilagisinnaallugu piffissap ilaannaani sulisorineqartussanik avataaniit tikisitsinissamut akuersissuteqarneq. Maannamut kinguneqanngitsumik.