Royal Greenland siulittaasussaa toqqarneqareerpoq

Naalakkersuisunut ilaasortat Jørgen Wæver Johansen aamma Johan Lund Olsen naalakkersuisunut illuatungiliuttunit Atassutikkunnit Demokraatinit Kattusseqatigiinnillu Royal Greenland pillugu nassuiaateqaqqullugit ippassaq piumaffigineqarput. Piumaffigineqarnertillu malillugu ullumi nassuiaateqarput. Namminersornermut naalakkersuisoq Jørgen Wæver Johansen oqarpoq:

- Naalakkersuisut tungaanniit killiffiup sumiinnera aammalu uagut qanoq isigineripput nassuiaassutigaarput.

- Naamminersortunngorsaanissamut periarfissat assigiinngitsut suunersut aqutsisooqatigiinnit Royal Greenlandimiillu misississorneqalissapput. Siulittaasunngortussap naalaakersuisoqarfillu sisamat peqataatillugit misissuisoqalissaaq. Suliassaq suliarineqareerpat naalakkersuisullu isummerfigereerpassuk, ingerlatseqatigiiffiup siulersuisuinut naalakkersuisunit namminersortunngorsaanissamut innersuussutigineqartut ingerlateqqinneqassapput.

- Taamaaliorniarnerlu ataasinngorpat ataatsimeersuarnermi oqaluttuarineqassaaq, siulittaasussamillu suleqatigiissitsisinnaasumik katersuuffiusinnaasumik aammalu suliat pitsaasumik ingerlanneqarsinnaanerannik tapertaalluarsinnaasumik misilittagaqarluartumik kiisalu nunatsinni aalisarnermut misilittagaqarluartumik pissutsinillu ilisimaarinnilluartumik, naalakkersuinermilu aalajangiisarnermik ilisimaarinnittumik toqqaanissaq naalakkersuisut aalajangiutereerpaat.

- Paviaaraq Heilmann ataasinngorpat inassutigineqassaaq. Pereersut qiaatiginagit siunissamulli qanoq aaqqissuteqartoqarnissaa sulissutiginiarpavut.

– Pereersuni, soorlu isumaqatigiissuisiortoqarsimappat, takusimannginnakkit oqaaseqarfigisinnaanngilakka. Jørgen Wæver Johansen oqarpoq.  

Royal Greenland ataasinngorpat nalunaaqutaq aqqanernut immikkut ittumik ataatsimeersuassaaq, ataatsimeersuarnermilu Paviaraq Heilmann siulittaasussatut inississaaq, Paaviaaqqallu namminersortunngorsaanissamut periarfissat misissugassat siuttuuffigissavai.