Royal Greenland sinneqartooruteqarluni kiisami takutitsisoq
Naak Royal Greenlandip sinneqartoorutai amerlanngikkaluartut nunatsinni suliffeqarfiit annerpaartaanni nuannaarutissaqarpoq.
Aalisakkerivissuaq 2025-mi akileraannginnermi 6 millionit koruuninik sinneqartooruteqarpoq.
Royal Greenland tusagassiuutinut nalunaarummi allappoq.
- Isertitaqarnerput aningaasaqarnikkullu toqqavipput nukittorsarpagut, tamannalu Nunatsinni tunisassiornermut aamma nunami tunisassiorfinnut ukiuni aggersuni aningaasaliinissarput eqqarsaatigalugu pitsaanerujussuarmik aallaavissaqalersitsivoq, pisortaaneq, Toke Binzer tusagassiuutinut nalunaarummi oqarpoq.
Royal Greenlandimut 2023 aamma 2024 ilungersunarput. Suliffeqarfissuarmi ukiuni taakkunani akileraannginnermi koruuninik 255 millioninik aamma 196 millioninik amigartooruteqarpoq.
2025-mi ingerlatsinermi angusat, akileraannginnermi ernianullu aningaasartuuteqannginnermi inernerit misissoraanni Royal Greenlandimut aamma pitsaasoqaaluppoq.
Ingerlatsinermi angusat 2025-mi 299 millionit koruuniupput. 2024-mi 161 millionit koruuniupput.
Naallu aalisarnermi ukioq pitsaanngikkaluartoq inernerit pitsaasuupput.
Aalisagakinnerugaluarluni inernerit pitsaanerusut
Saarulliit raajallu 2024-mi ukiup sisamararterutaa siulleq 2025-mut sanilliullugit pisarineqartut ikileriarujussuartut takuneqarsinnaavoq.
Siorna ukiup sisamararterutaani siullermi pisat 3000 tonsit 4.000 tonsillu akornanni ikilisut Naatsorsueqqissaartarfimmi allassimavoq.
Naallu taamaattoqaraluartoq Royal Greenlandip 5,6 milliardit koruuninik kaaviiaartitaqarnini attatiinnarpaa, taakkulu 2024-mi kaaviiaartitanit millioninik arlalinnik amerlanerullutik.
- Tunisassiassanik ikinnerusunik suliaqaraluarluta kaaviiaartitat attatiinnarsinnaasimavagut, Toke Binzer oqarpoq, nangillunilu:
- Tamanna niuerfinni nioqqutissat akitsoriartornerinik pissuteqarpoq, annerpaamilli aamma suliffeqarfimmi siunnerfilimmik suliniuteqarnermik, aningaasartuutinik sukannersumik aqutsinermik sunniuteqarluartumillu aaqqissuussinernik pissuteqarluni, taamaalilluta naggataatigut tunisassiassanit naleqarnerusumik pissarsisinnaalerluta.
Royal Greenlandip suliat inaarutaasumik angusanut kingunerluuteqarsimasut arlallit 2025-mi naammassineqartut aamma erseqqissaatigaa.
Royal Greenlandip Chilemi ingerlatai 2023-mi 2024-milu millionilinnik amigartooruteqartitsipput. Chilemi ingerlatat tamarmik asoorunneqarlutik tamanna 2025-mi kiisami naammassineqarpoq.
Tamatuma saniatigut Tysklandimi akileraartarnermut suliaq pisoqaanerusoq naammassineqarpoq Norgemilu ingerlatat asoorunneqarlutik.
- Ingerlatanik aaqqissuussinerup kingunerisaanik siunissami nukivut pingaarnerpaamut atorsinnaanerulissavagut, tassa Atlantikup Avannaani aalisarnermut tunisassiornermullu, Kalaallit Nunaat qitiutillugu, Toke Binzer oqarpoq.
Naalakkersuisunit isornartorsiuineq
Royal Greenlandimi aqutsisut tamangajammik nunani allani najugaqarnerat pillugu 2023-mi isornartorsiorneqarpoq. Naalakkersuisut tassunga atatillugu qullersaqarfiup nunatsinniinnissaanut nunatsinnilu tunngaveqarnissaanut piumasaqaateqarput.
Siorna pisortaanerusoq, Susanne Arfelt Rajamand nunani allani najugaqartoq soraarsinneqarpoq.
Toke Binzerilu TDC-mi, IBM-imi Tusassimilu atorfeqarsimasoq decembarip aallaqqaataanni atorfinippoq.
Qullersaqarfimmiittut tamarmik nunatsinni ullumikkut najugaqarput.
- Aalajangiinerit aalisarnermut tunisassiornermullu qanittumi pisaraangata, aamma pitsaanerusarput. Pingaarnerpaatut Nunatsinni naleqarnerulersitsinissaq pillugu ingerlatsivugut, taamaattumillu soorunami aamma ingerlatsinitsinnut aallaavigisatsinni, tassa Kalaallit Nunaanni, nukittuumik toqqammaveqartariaqarpugut, Toke Binzer oqarpoq.
Qullersaqarfiup tamarmi Nuummi katersuunneratigut 2025-milu torersaasoqarneratigut Royal Greenland 2026-mut neriuutissaqarluarpoq.
Naatsorsueqqissaartarfimmit kisitsisit naapertorlugit aalisarneq ukioq manna aamma pitsaanerorpasilereerpoq. Saarulliit 8.000 tonsinik raajallu 3.000 tonsinik amerlanerusut ukiup sisamararterutaani siullermi pisarineqareerput.
- Suliassama pingaarnerpaartaraa Royal Greenlandip Kalaallit Nunaanni suliffeqarfittut siunissami nukittuujujuaannarnissaa qulakkiissallugu, suliffissanik pilersitsilluni nunamullu naleqartitsilluni. Upperaara aqqut eqqortoq ingerlavigigipput, Toke Binzer oqarpoq.
