Royal Greenland: Piuinnarnissarput maanna aalluttariaqarparput
- Raajartassat qaleralittassallu ikiliartorput. Saarulliit siorna pisassiissutigineqartut neriuutigisatsinnit ikinnerupput. Taamaammat tunisassiatsinnit aningaasat isertitavut neriuutigisatsinnit ikinnerupput, siulittaasoq Peter Grønvold Samuelsen oqarpoq.
Royal Greenland nunani allani annerusumik tunisassiorpoq, tunisassiat 70 procentii nunani allaneersuullutik. Nioqqutissiassalli 30 procentii Nunatsinneersut kaaviaartitat 40 - 50 procentiannik naleqartut, siulittaasup unnerpaa. Aammali Royal Greenlandip siulersuisuisa nalunaarutaanni ersippoq, suliffeqarfissuup sulisuisa affaasa missaannaat nunatsinneersuusut.
- Aalisakkanilli tunisisartut, inuit ataasiakkaat aalisartitseqatigiiffiillu assigiinngitsut, 1800-it sinneqarput. Tassalu inuit 3000-it missaat Royal Greenland toqqaannartumik aningaasarsiorfigaat, suliffeqarfissuup siulittaasua erseqqissaavoq.
Kaaviiaartitat ukiup siulianisut 5,1 mia. koruuniusut amigartoorutit siorna 78 mio. koruuniupput. Tamatumalu kinguneraa, nuannarineqanngitsunik aalajangertariaqartarnera, soorlu nunaqarfinni tunitsivinnik akilersinnaanngitsunik matusisariaqartarsimasut.
- Uagut ingerlakkusuppavut ingerlatat suulluunniit imminut akilersinnaasut. Taamaanngippat aningaasanik attartorfigisatsinnit apeqquserneqarnerput ima sakkortutigilersinnaavoq, allaat Royal Greenlandip tamarmiusup ingerlataanut aporfinngorsinnaalluni annertooq, Royal Greenlandip siulersuisuisa siulittaasuat, Peter Grønvold Samuelsen oqarpoq.