Royal Greenland pisortaanertaarpoq

Royal Greenlandip ataatsimeersuarneranut atatillugu suliffeqarfiup pisortaanera Flemming Knudsen Mikael Thinghuusimit februaarip ulluisa aallaqqaataanni taarserneqassaaq, Mikael Thinghuusip, Århusimi najugalilip suliffittaamini sulilluarnissani isumalluarfigaa.

- Suliffittaara unamminassaaq ulapinnarlunilu, oqaatigisinnaavarali atorfittaara pissangagigakku nuannerunartillugulu. Maanna suliffissuup aningaasaqarniarnera ilorraap tungaanuit ingerlavoq, siumut ingerlanera aamma ingerlatiinnassavarput.

Aalisarnermut naalakkersuisoq Ane Hansen suliffeqarfissuup Royal Greenlandip aningaasaqarnera pitsanngoriarmat nuannaarutiginnippoq.

- Naalakkersuisunit Royal Greenlandip aningaasaqarnerata siuariaateqarnera nuannaarutigaarput, Ane Hansen oqarpoq.

Naalakkersuisut Royal Greenlandimik ingerlatsisunut siorna aningaasartuutit amigartooruteqarfiunngitsumik inissisimanissaannik piumaffigaat, taamaattoqanngimmalli suliffeqarfissuup aningaasartuutimini amigartoorutaat 43 millioni koruuniusut naalakkersuisunit akuerineqarput. Naalakkersuisut nuannaarutigaat suliffeqarfissuaq 159 millioni koruuninik kingullermernit amerlanerusunik isertitaqarmat.

- Naalakkersuisunit Royal Greenlandip aappaagumut anguniagaa, aappaagumut 50 millioni koruuninik sinneqartoorsinnaalernissaq upperaarput, Ane Hansen oqarpoq.