Royal Greenland oqaloqatiginnikkumavoq
Oktoberimi 2005-imi atuutilersumik raajat sikulersukkat akiinik isumaqatigiissuteqarnermik KNAPK-p maanna atorunnaasitsinera pillugu Royal Greenland aalisartut piniartullu kattuffiannik oqaloqatiginnikkumavoq.
Aalisartut piniartullu kattuffiat januaarip 31-iani allagaqarluni nalunaarpoq raajanut sikulersukkanut Royal Greenlandimut akinut isumaqatigiissut ukiaq oktobarimeersoq marsip aallartinnerani KNAPK-mit atorunnaarsinneqassasoq. Nunarsuarmi uuliap akitsoriartuinnarnera raajallu sikulersukkat akimikkut appasinnerujussuat atorunnaarsitsinerminnut tunngaviusut KNAPK nalunaarpoq.
Isumaqatigiissumik atorunnaarsitsinermut KNAPK-mit tunngavilersuutigineqartoq Royal Greenlandip ingerlatsisuinit paasilluarneqartoq, tamannalu pillugu KNAPK-mik oqaloqateqarnissamut ammallutik Royal Greenlandimi pisortaanerup tullia Henrik Leth radioaviisimut oqarpoq.
- Nunarsuarmi raajanik tunisaqarneq tamarmi ajornartorsiorpoq, raajat akii apparaluttuinnarput uulialu akitsoraluttuinnarluni, tamannalu pillugu KNAPK-p isumaqatigiissummik atorunnaarsitsinera paasilluarsinaavara, Henrik Leth erseqqissaavoq.
Nunarsuarmi raajat akiinik ajornartorsiuteqarneq Royal Greenland-mut amigartooruteqartitsivoq, tamannalu pillugu suliffissuarni ataasiakkaani annertunerusumik tunisassiortitsinikkut amigartoorutinik matussusiiniarneq maanna ingerlanneqartoq Henrik Leth oqarpoq.
- KNAPK-ip isumaqatigiissummik atorunnaarsitsinera siorasaarinertut tigunngilarput, suliffissuarnullu tulaassiumajunnaartoqassappat, tamanna suliffissuarnik matusisariaqalernermik kinguneqarsinnaalluarmat KNAPK-mik oqaloqatiginnikkusuppugut, Henrik Leth oqarpoq.
Namminersornerullutik Oqartussat aalisarnermut tapersiissuteqarnissaat pillugu Royal Greenlandip KNAPK-llu saaffiginnissuteqarneri suli akineqarsimanngillat.
Akinik isumaqatigiissutip unitsinniarnera, qaammammik ataatsimik sioqqutsilluni pisussaavoq, allanngortoqassappallu marsip aallaqqaataa tikitsinnagu tamanna pisariaqassalluni.
