Pisortaq Paaviaaraq Heilmann ilisarnaatitaartik pillugu ima oqarpoq:
-Ilisarnaatitsinni allagartat krone-p saniani inissisimapput, taakkulu piumasaapput krone-p ataatungaanut inissinneqassasut. Taavalu aamma piffissaq iluatsillugu Royal Greenlandip ilisarnaataata allanneri nutarterpagut. Tassa piffissamut naleqqussartutut ililluta naleqqussaavugut. Ilisarnaatitsinni malittut isikkulik ilanngunneqarpoq tunisassiat immameersuunerat takutinniarpaput taamaalillugu, pisortaq Paaviaaraq Heilmann nassuiaavoq nangillunilu:
- Ilisarnaatitsinni nutarsaanitta kingunerani kissaatigaarput tunisassiagut assigiiaarnerusumik poortorneqartalissasut aammalu pappiaraatitsinni tamani ilisarnaat ilanngunneqassaaq, Paaviaaraq Heilmann taama oqarpoq. Royal Greenlandip ilisarnaammini nutarsaanera akisuallaassannginnersoq aperineqarami ima oqarpoq:
- Naamik immikkut akisuutut isiginngilarput pissutigalugu naatsorsuutigigatsigu assigiiaanik ilisarnaateqalerutta aamma pissarsiarineqarsinnaanerat ajornannginnerussasoq aamma nioqqutissaatitta ilisarineqarsinnaanerulernissaannut pingaaruteqarluni.