Royal Greenland nunarsuarmi suliffissuit ilaannut tikeraarpoq!
Royal Greenland-ip paasisitsiniaajutigaluni Europami fabrikkiutiminik nittarsaanerani ullumikkut Polen-imut killippugut.
Ullaap tungaani Polenip kimmut avannaani Europami pujooriviit annersaat Utzka-miittoq Royal Greenland-ip piginneqataaffigiligaa ullumikkut inunnik 1.100-nik sulisoqartoq takornariartinneqarpoq.
Pujoorivissuup taassuma tunisassiai nunarsuarmi pilerigineqarluartuugamik tunisassiornermigut angummassinnaajunnaarsimammat suliffissuaq allilerneqaleruttorpoq.
Pujoorivissuarmut nutaaliaalluinnartumut takornariareernerup kingorna suliffissuakorsuaq nersutinik toqoraaviusimasoq “Angros Koszalin” Polen-ip avannaani suli kippasinnerusumiittumiittoq takornariartinneqarpoq.
Suliffissuakorsuaq taanna iluarsartuutassarujussuuvoq, iluarsartuunneqarnissaanullu aningaasartuutissat matussuserneqarnissaannut Royal Greenland Poleni aqqutigalugu taperneqarnissamik EU-mut qinnuteqarpoq, maannamulli akineqanngitsumik.
Royal Greenland-ip pisortaanerata Keld Askær-ip erseqqissaatigaa iluarsartuussinissamut taperneqarnissamik qinnuteqaat itigartinneqassappat suliffissuakorsuup Europamut kangillermut pilersuisussatut aalisakkerivinngortinneqarnissaanik pilersaarutit nalilersoqqinnneqartariaqassasut.
Danmarkilli Polenimi ambassadøriata Karen Wermuth-ip Koszalinimi takornariartitsinermi peqataasup oqaatigaa, Royal Greenland-ip qinnuteqaataata Polenip naalakkersuisuinit akuersaartumik suliarineqarnissaa EU-mullu ingerlateqqinneqarnissaa nammineq isumalluarfigalugu.
Angalanermi politikerit peqataasut, Inuussutissarsiornermut Naalakkersuisoq Siverth K. Heilmann, Atassut, Inatsisartuni ilaasortat Ane Hansen, Inuit Ataqatigiit aammalu Ruth Heilmann, Siumut, tamarmik angalanermi pissarsilluarnerarlutik unnersiorput.
- Tanngassimaarnaqaaq paasillugu Royal Greenland Europami qanoq ingerlalluartiginersoq, Ane Hansen radioaviisimut oqarpoq.
- Nunarsuarmioqataanitta aqqani Royal Greenland-ip Europami iliuusai tutsuiginartuupput, Royal Greenland-illu nunarput kusanartumik kiinnertippaa, Ruth Heilmann oqarpoq.
Taamatuttaaq Inuussutissarsiornermut Naalakkersuisoq takusaminik paasisaminillu naammagisimaarinnilluarpoq.
Ataatsimut isigalugu angalaneq pissarsiffiulluarlunilu paasisaqarfiulluarluni ingerlanneqarpoq, angalanerlu aqagu Danmarkimi Royal Greenland-ip Gløngøremi suliffissuaataani naggaserneqassaaq.
Jensine Berthelsenip, Koszalin-imiit, Polen-imiittumiit tusagassiaa naapertorlugu allagaq ilanngunneqarpoq.
