Royal Greenland naatsorsuutitigut aatsaat taama angusarissaartigisoq

Royal Greenlandip naatsorsuutini saqqummiuteqqammerpai. Akileraarutit ilanngaatiginagit 335 millionit koruuninik sinneqartooruteqarpoq 7 milliardit koruuninillu kaaviaartitaqarluni. 

Ingerlatseqatigiiffissuaq aatsaat taama sinneqartooruteqartigisoq, Royal Greenland tusagassiorfinnut nalunaaruteqarluni taama allappoq.

Akileraarutit ilanngaatigereernerini sinneqartoorutit 173 millionit koruuniupput. Royal Greenlandillu pisarneq malillugu sinneqartoorutit affaat piginnittuminut, Namminersorlutik Oqartussanut, tunniuttussaagaluarpai.

Tamanna nunatta karsiata 87 millionit koruuninik pissarsiaqarfigissagaluarpaa, ukioq mannali ataatsimeersuarnermi immikkut ittumik aalajangiunneqarpoq Namminersorlutik Oqartussat iluanaarutinit pissarsiassaat 100 millionit koruuninut qaffanneqassasut.

2016-imut naatsorsuutit immikkoorutigaat qaammatit 15-it tunngavigineqarmata. Tamannalu ukiup naatsorsuuseriffiusup allanngortinneqarnissaanik, tassalu siunissami ukiumik ilivitsumik tunngaveqarnissaanik kissaateqarnermik pissuteqarpoq. Sinneqartoorujussuarneq taamaalilluni Royal Greenlandip naatsorsuutinut nalinginnaasunut naleqqiullugu qaammatini pingasuni kaaviiaartitaqarnerusimaneranik pissuteqarpoq.

Taamaakkaluartoq naatsorsuutitigut aatsaat taama angusarissaartigisoqarpoq, suliffeqarfissuaq tusagassiorfinnut nalunaarummini taama allappoq:

- Qaammatit aqqaneq-marluk tunngavigalugit akileraannginnermi angusat siorna ukiumoortumik naatsorsuutini aatsaat taama pitsaatigisumik angusaqarfiusimasunit  20 millionit koruuninit amerlanerusunit qaffasinnerupput.

Ukiuni kingullerni naatsorsuutini angusaqarluarnerup 2017-imi aamma ingerlaannarnissaa Royal Greenlandip naatsorsuutiginerarpaa.