Royal Greenland: Malittarisassat ersarinnerusariaqarput
- Baffinip kangerliumarngani qalerallittassiinermi malittarisassat suunersut ersarinnerusariaqarput, Royal Greenlandip pisortaa Henrik Leth taama oqarpoq.
Qalerallit 1825 tonsit Sigguk A/S-imut tunniutivinneqaqqammerput, qalerallillu akii pillugit Royal Greenlandip Sigguk A/S-illu isumaqatigiinniarnerat iluatsissappat, Aasianni Royal Greenlandip suliffeqarfia ammaqqittariaqassagunarpoq.
Isumaqatigiittoqassagaluarpalli Royal Greenlandip pisortaa nuannarivallaassagunanngilaa suliffeqarfimmik ammaaqqiinissaminut.
Royal Greenlandimmi nammineq qaleralittaminik Aasianni suliffeqarfiutiminni suliarineqartarnissaat siunniussimagaluarpaat, Henrik Leth oqarpoq.
Taanna aamma oqarpoq aningaasarsiorluarfigisinnaasartik – tassa qaleralinniarneq – naalakkersuisunit unammillertaanut tunniunneqarsimasoq.
- Taamaammat qaleralittassiinermi malittarisassat ersarinnerusariaqarput, aalajangiinermullu suut tunngaviusarnersut aamma ersarinnerusariaqarlutik, Henrik Leth oqarpoq.
Polar Seafoodip kilisaataataa tulaassisartussaavoq, Henrik Lethillu oqaasii malissagaanni Polar Seafood aningaasarsiorluarneruliinnassaaq.
Erseqqissaatigiinnarpaalu pisassiinermut tunngaviusut kinaassuserfiunngitsuusariaqartut.