Royal Greenland Kangiani iluatitsilluarpoq

Royal Greenlandip iluanaaruteqangaatsiarsimanini Namminersorlutik Oqartussanut tunniussisoq Mikael Thinghuusip erseqqissarpaa.

Suliffeqarfik 113 millionit koruuninik akileraarutit peereerlugit iluanaaruteqarpoq, naak ukiaq sikuusimagaluaqisoq. 

Saqqummiussinermini aamma erseqqissarpaa Kina Japanilu aatsaat taama pitsaatigisumik isertitaqarfigineqartut, tassa Kangiani 1 milliardit koruunit isertissimammassuk.

Aamma atuaruk Ukioq Royal Greenlandimut aalisartunullu iluatsitsiffiuvoq

Angusarissaaneranullu tamanna peqquttaaqataalluinnartoq Mikael Thinghuus oqarpoq. 

- Japanimi sulisugut ukioq manna 30-nngorput, sulisullu taakku kalaallit aalisagaannik kinguppannillu tuniniaasarput ukiumut 500 millionit koruuninik isertitsisarlutik, pissanganarnerpaavorlu ukiormanna siullerpaamik Kinami tuniniaanitsinni 500 millionit koruunit angugatsigit. Kina angisoorujussuuvoq, niuffaffiillu assigiingitsorpassuullutik, kisianni ataatsimut isigalugu Kinami 500 millionit koruunit sinnerlugit tunisivugut, Royal Greenlandimi pisortaaneq Mikael Thinghuus taama oqarpoq. 

Siulersuisut

Royal Greenlandimi siulersuisut ullumi ataatsimeersuarmata siulersuisuni ilaasortat allanngunngillat.

Siulersuisuni ilaasortat ataatsimeersuarnermi qinikkat arfiniliusut, sulisullu toqqagaattut qinikkat pingasut allannguuteqaratik ingerlaqqittut, Royal Greenlandip nittartagaani ilaatigut atuarneqarsinnaavoq.

Siulittaasoq Niels de Conninck-Smith taamaasilluni siulittaasutut ingerlaqqippoq.

Sulisut sinnerlugit Royal Greenlandip siulersuisuini ilaasortatut qinikkat ukiut sisamakkuutaarlugit qinerneqartarput, 2014-imilu kingullermik qinersisoqarluni.

Royal Greenlandip qullersaqarfiata Nuummiittup nerisarfiani ataatsimeersuartoqarpoq.