Royal Greenland isornartorsioqqinneqarpoq
Qeqertarsuup tunuani aalisartunut tunisinermi akigitinneqartut appariartulernissaat nalinginnaasumik aarleqqutigineqarnera, Royal Greenlandip Qeqertaq Fishimi piginneqataassutinik pisiortornerata isornartorsiorneqarneranut pissutaanerpaavoq. Royal Greenlandip sumiiffimmi qaleralinnut tunngatillugu unammilleqatigiinnermik atorunnaarsitsinissaa isornartorsiuisut aarleqqutigaat.
- Nusukap tungaanit isumaqanngilagut ingerlatseqatigiiffiup pisortanit pigineqartup aningaasarpassuarnillu tunuliaqutaqartup qaleralinnut tunitsiveqarnermik kisermaassisuunerminik utertitsiniarluni unammilleqatigiinnermik annertusaaniarnera pitsaasumik politikkeqarnerusoq. Sumiiffimmi aalisartut Halibut Greenlandimik tapersersuinissaat neriuutigaarput, taamaaliornikkut qaleralinnik tunisinermi unammilleqatigiinneq qulakkeerumallugu, naggataatigummi tamanna aalisartut iluaqutigisussaavaat, Gerth B. Lynge Nusukameersoq, tusagassiorfinnut nalunaaruteqarluni allappoq.
Sulisitsisut peqatigiiffiata naatsorsuutigaa namminersorlutik oqartussat namminersortunik inuussutissarsiornikkut suliniuteqartunik tapersersuinissamik neriorsuuteqarsimanertik naammassissagaat, taamaaliornikkut, Halibut Greenlandip, ingerlatseqatigiiffiusup namminersortunit pigineqartup ingerlatseqatigiiffimmit namminersorlutik oqartussat aningaasaataat atorlugit ingerlanneqartumit unammillerneqarneq pissutigalugu matusariaqalinnginnissaa qulakkeerumallugu.
-Tunitsiveqarnikkut allamik periarfissaqartuarnissaa, aammalu Halibutip pilersinneqannginnerani tunisinermi akit qanoq issimanersut aalisartut eqqaamajuassagaat neriuutigaarput. Neriuutigaarputtaaq Upernaviup Uummannallu eqqaanni aalisartunut iluaqutaasussamik tunitsiveqarnerup iluani unammilleqatigiinnermik ammaassisoqassasoq, Gerth B. Lynge naqissusiivoq.
