Royal Greenland iluanaarutissanik pitsanngorsaaniarpoq

- Nalunanngilaq allat assigalugit aningaasatigut ajornartorsiornermik sunnerneqarsimasugut. Tamatumalu kinguneraa annikinnerusunik tunisaqarsimanerput. Tunisassiassat suliarineqanngitsut akiisa qaffasinnerat pissutaalluni aningaasatigut ajornartorsiorneq aallartippoq, ilutiganik nunani allani aningaasat nalingat appasilluni. Tamannalu pitsaanngitsumik uagutsinnut kinguneqarpoq. Soorunalimi taamatut angusaqarneq naammaginngilarput. Tamannalu pillugu Royal Greenlandip iluanaarutaasa pitsanngortinniarnissaannik suliniutit arlaqartut aallartipput, pisortaq oqarpoq.

- Akiliisinnaassuseqarneq pitsanngortinniarneqarpoq, aningaasaliisarneq kigaannerusumik ingerlalersinneratigut. Minnerunngitsumillu suliffeqarfissuup aningaasatigut pituttorsimaffii annikillisarniarpagut pingaarnerpaamik nioqqutissanik uninngasuutit ikilisinniassallugit.

Aningaasartuutinik pitsanngorsaavugut, allaffinni atorfillit 7 procentit missaannik ilanngarlugit, ilanngullugu ingerlasussanik piareersaaneq aqutsinerlu kiisalu pisiortorneq allangortitissallugu pilersaaruteqarpugut. Aammattaaq suliassatut pilersaarutit avataaniit allannguuteqartoqarnissaanut sukkanerusumik iliuuseqartarnissarput piareersarparput.

Suliniutitsinnut ilaapput kilisaat ataaseq atorunnaarsillugu Canadamut atukkiukkatsigu aammalu USA-mi ingerlatseqatigiiffik ataaseq iluanaaruteqarfiunngitsoq matullutigu. Taakku saniatigut Kalaallit Nunaanni nunaqarfinni tunitsiviit arlallit matuneqarput. Iliuuserisallu taakku ataatsimut katikkaanni ingerlatsinikkut pitsannguutaasinnaasut 200 mio. koruunit sinnerlugit naleqassangatitavut aallartippavut, Flemming Knudsen oqarpoq.

Ukiup affaanut naatsorsuutisi qiviaraanni, ukioq kingulleq ammuinnaq ingerlasoqarsimavoq, tamatuma allannguuteqarnissaa qaqugu pissasoq ilimagaajuk?

- Tamanna ukiut tulliuttut marlussuit ingerlaneranni pissasoq ilimagaara.

Ippassaq qanoq issuseq pisarnertut pitsaanerpaatut nalilerpat, taamatut naliliisimanerit suli aalajangiusimaviuk?

- Ippassaminngaanniit pisoqarsimaqaaq, ilaatigut Namminersornerullutik Oqartussat ilanngupput, tamanna soorunami qujaruteqaara, kisiannili pisarnertut pitsaanerpaaq atorlugu ingerlaniarpugut, Flemming Knudsen oqarpoq.

Naalakkersuisunngortussat ippassaq neriorsuutigaat Royal Greenland 500 mio. koruuninik ataasiakkamik ikiorniarlugu.