Royal Greenland eqqorneqarsinnaavoq!
Jaapanimut neqinik tunisassiornermi danskit akitsorterinermikkut peqquserlunnerat Royal Greenlandimut kinguneqapilussinnaasoq, aviisi Berlingske Tidende ullumi allaaserisaqarpoq.
Taama kusanaatsuliornermut tunngaviuvoq, Danish Crown-ip pigisaata selskabip Ess Food-ip aqutsisui marluk jaapanimut tunisassiornermi akitsorterinermi maleruagassanik peqquserluttarsimammata aammalu peqquserlullutik allakkiortarsimammata. Taakku marluullutik jaapanimi puulukit neqaanik 6.000 tonsinik pisisimapput, unioqqutitsillutillu akinik aaqqiissuteqarsimallutik.
Berlingske Tidende naapertorlugu, peqquserlunnerup tamatuma danskit kalaallillu tunisassiorfii soorlu Royal Greenlanditut ittut eqqorneqarsinnaapput, tassami jaapanimiut tusaamanerluilerpata immussuarnik, aalisakkanik, raajanillu tunisassiorneq kalluarneqarsinnaammat.
- Royal Greenlandimi tamatuma kingunerinik suli malugisaqanngilavut, Royal Greenlandip tunisassiornikkut pisortaa, Morten Sander Berlingske Tidende-mi issuarneqarpoq.
Raajat, aalisakkat, assagiarsuillu Royal Greenlandip jaapanimut ukiumut 400 millioni koruunit sinnerlugit nalilinnik tunisarpai. Oqaatigineqarporlu, maannakkorpiaq jaapanimut tunisassiorneq qaffakkiartornerup nalaaniileruttoraluartoq.
