Royal Greenland A/S avammut samminerulissaaq
Royal Greenland A/S-ip Namminersortunngorsarneqarnissaanik pilersaarutit unikaallatsinneqarput, ukiunilu tulliuttuni nukiit Royal Greenland-ip nunatsinni nunanilu allani inissisimanera nukittorsarniarneqarpoq.
-Royal Greenlandip Europami suliffissuaatiminik nittarsaanera ullumi suliffeqarfissuup suliffissuaataani Gløngøremi Jyllandimiittumi tamanit naammagisimaarneqartumik naammassineqarpoq.
Royal Greenlandip pisortaanerata Keld Askærip nittarsaanerup naammassineqarnerani erseqqissaatigaa Royal Greenland-ip namminersortunngorsarneqarnissaanik maannakkut pilersaaruteqartoqanngitsoq, paarlattuanilli Keld Askærip erseqqissaatigaa Royal Greenlandip tungaanit Namminersornerullutik Oqartussat piginnittuunerat namminneq naammagisimaarlugulu toqqissisimanarigitsik, aammalu suliffeqarfissuup inuiaqatigiinnit kalaallinit pigineqarnera suliffissuup nukittoqqutigigaa.
Keld Askærilli taamatut naqissusiinerminut ilanngullugu erseqqissaatigaa Royal Greenland killiffimmini uninngaannarani ineriartortinneqartariaqartoq, nunarsuarmilu aalisakkerinikkut unammillertiminut nukittulluni akiuussinnaassappat nutarterisoqartariaqartoq.
Tamanna tunngavigalugu Royal Greenlandip tungaanit pilersaarutigineqaraluarpoq ualeq manna naggasiinermi suliffeqarfik aningaasaliisarnermik siunnersuisarfik Alfred Berg Kompagni peqatigalugu Royal Greenlandip siunissaa pillugu pilersaarusiamik Naalakkersuisutsinnut saqqummiussisoqassasoq. Tamannali kinguartiinnarneqarpoq Naalakkersuisut Siulittaasuat Hans Enoksen, Aalisarnermut Piniarnermullu Naalakkersuisoq Finn Karlsen aammalu Aningaasaqarnermut Naalakkersuisoq Josef Motzfeldt, ilaatigut pilersaarutit pillugit siumoortumik paasissutissanik pissarsisimannginnermik pissuteqarnerarlutik peqataanissaraluarnerminnik unitsitsiinnarsimanerisa kingunerisaanik.
Royal Greenlandilli siulersuisuini siulittaasup Paaviaaraq Heilmannip oqaatigaa Royal Greenlandip siunissaa pillugu Naalakkersuisunik ataatsimeeqateqarnissamik pilersaaruteqarneq unitsinneqanngitsoq namminnerlu naatsorsuutigigitsik siunissami qaninnermi, naalakkersuisut pisinnaaleriarpata ingerlanneqarumaartoq.
- Royal Greenlandip februaarimi ileqquusumik ataatsimeersuannginnerani piginnittut peqatigalugit Royal Greenlandip nukittulluni unammillersinnaassuseqarluarlunilu ingerlaqqinnissaa ineriartortinneqarnissaalu pillugit pilersaarutit suliarissavagut, neriuutigaarpullu tamatta paaseqatigiissutigisatsinnik naammassisaqarumaarluta, Paaviaaraq Heilmann, nammineq siulittaasutut ingerlaqqinnissaminik soqutiginnittoq Radioaviisimut oqarpoq.
Paaviaaraq Heilmannip angalaqatigiinnut naggasiilluni oqaaseqarnermini erseqqissaatigaa Royal Greenland-ip siulersuisuinit suliffeqarfissuup Keld Askær siuttoralugu ingerlanneqarnera aqunneqarneralu siulersuisuinit namminneq naammagisimaaritsik.
