Royal Greenland: Attaveqatigiinneq pitsanngorsarneqassaaq
-Ajuusaarnarpoq, taamaalisoqaqqissanngilarlu.
Taama oqarpoq Royal Greenland-ip siulersuisuini siulittasoq Pâviâraq Heilmann, naalakkersuisunik ullumi ataatsimeeqatigineqareerluni.
Ilulissani Qasigiannguanilu suliffissuit piffissami sivisunerusumi matuneqarnissaasa nalunaarutigineqarnerisa kingorna, naalakkersuisut siulittaasuat Hans Enoksen, naalakkersuisunullu ilaasortat Finn Karlsen, Siverth K. Heilmann-ilu ataatsimiigiaqqusipput.
Royal Greenland-imi siulersuisuini siulittaasup naveersinnerunnginnerarpaa, illuatungeriillu pisimasoq ilinniarfigisimanerarlugu.
Suliffeqarfiup piginnittullu – Namminersornerullutik Oqartussat – akornini attaveqarnerluttoqarsimavoq, pitsaanerusumillu qanoq attaveqatigiittoqarsinnaanera Pâviârak’ Heilmannip suliffeqarfiup iluani oqaloqatigiissutigissamaarnerarpaa.
Pisut Royal Greenland-ip ulluinnarni aqutsisuinut aamma kinguneqartinneqassannginnerarpai.
