Royal Greenland ataatsimeersuarpoq

Royal Greenlandip ullumi ataatsimeersuarnermini kaaviaatitamini 4 milliarder koruunit angusimalerpai, aningaasarsiornermili nunarsuarmi pissutsit assigiingitsut pissutaallutik ukiumi angusap inernera siulittaasutut qinigaaqqittup Paaviaaraq Heilmannip naammaginarpallaanngitsutut isigaa.

Nunani niiveqatini aningaasat nalingi appariarsimapput, uuliap akisunerulersimavoq, raajallu tunisartakkat akii appariarsimapput. Aningaasartuutini angusassat anguniarnerini tunisassiassanik amerlasuunik pissarsisoqaqqaartariaqartoqarsimavoq.

Nunami nunanilu allani suliffissuit suli pitsanngorsaaffigeqqinneqassasut

Paaviaraq Heilmann ualiartoq ataatsimeersuarneq naammassimmat taama oqarpoq.

Suliffeqarfissuup qaqugu namminersortunngorsarnissaanut apeqqut Paaviaaqqap maanna oqaatigisinnaanngikkallarpaa piginnittut taanna suliassarimmassuk.

Naalakkersuisut siulittaasuata Hans Enoksenip Royal Greenlandip namminersortunngorsarnissaanut suli misissuisoqassanerarpaa, inatsisartunilu ukiaru ataatsimiinnermi misisukkat saqqummiunneqassanerarlugit.

Royal Greenlandip siulersuisuini siulittaasup Paaviaaraq Heilmannip nalilersuutaasinnaasut assigiingitsuunerarpai, aalajangiisusalli tassaanerarpai piginnittut.

Siulersuisuni ilaasortat pingasut Panneraq Olsenimit, maanna Sisimiut kommuniani pisortamit, KNR-ip pisortaanit Lars Lennert Sandgreenimit kiisalu tiggumiliorfimmi Dandymi pisortamit Lars Funderimit taarserneqarput.