Royal Greenland aningaasarpassuarnik naleqarpoq
Royal Greenland massakkut tunineqassagaluarpat Namminersornerullutik Oqartussat 3 milliardi koruuninik tamanna iluanaarutigissagaluarpaat.
Aviisi Børsen ullumi saqqummersoq allappoq, Royal Greenland 2 milliarder koruuninut siusinnerusukkut nalilerneqarsimagaluartoq maanna naleqarnerulersimasoq. Royal Greenlandip unammillertaasa nalingi siorna 2005-imi qaffassimapput, taamaammat Namminersornerullutik Oqartussat aalisakkanik suliffeqarfiutaata 2,9 milliardi koruuninik naleqarnissaa Børsenip missingersuuppaa. Royal Greenlandimi pisortaaneq, Keld Askær, Børsenip paasissutissiissutaanut oqaaseqarusunngilaq, aviisimulli oqarluni 2 milliardi koruunit annikippallaartut.
Sinneqartoorutit Royal Greenlandip siunissami amerlanerusunngortikkusuppai. Akileraarutit ilanngaatiginagit 131 millioni koruunit suliffeqarfiup ukioq kingulleq sinneqartoorutigai, taakkulu 230 millioni koruuninut ukioq 2008-mi amerlisinniarneqarput. Atuisut piumasaannik piviusunngortitsiniarnermi aalisakkanik nutaanik tunisassiorsinnaanissaq takorloorneqarpoq, sinneqartoorutigineqartussatullu siunniussat taakkunannga pineqassasut siunniunneqarpoq.
Royal Greenland tunineqassagaluarpat suliffissuit sulisullu Kalaallit Nunaanniittut nakkutigineqarneri Namminersornerullutik Oqartussat ingerlatiinnarsinaavaat. Suliffissuilli Kalaallit Nunaata avataaniittut amerlanersaat tuniniarneqassapput, Børsenilu naapertorlugu, Royal Greenland Academymi pikkorissartitsisarnerit aqqutigalugit, Royal Greenlandip Kalaallit Nunaanni innuttaasunut akisussaassuseqarnini taamaalilluni qulakkiissavaa.
Royal Greenland tunineqassanersoq tunineqassannginnersorluunniit sapaatip-akunnerata uuma naanerani paasinarsissaaq, Royal Greenlandimi qullersat Naalakkersuisullu ataatsimiissammata. Suliffeqarfissuaq politikerillu tassunga atatillugu Polenimut Tysklandimullu angalassapput.