Royal Greenland Academy ingerlaqqippoq

novembarip 06-at 2006 13:19

Royal Greenlandip pisortaat siulersuisulli siulittaasuat avannaani suliffissuit sulisui oqaloqatigalugit suliffigiuminarsaanissaq qanimut naapisimaarnissaat pilersaarutigilerpaat, sulisunullu tupaallarnartoqarumaarpoq.

Tupaallannartoq kingusinnerusukkut uterfigeqqissavarput. Tunisassianik nutaanik nassaarsiuinnarani, pisortanillu atorfinitsitsiortoqinani ingerlatsinermullu atuiinnaqinani Royal Greenlandip suliffigiuminartuunissaata paasititsiniutiginissaa pingaaruteqartoq, Royal Greenlandip qullersaqarfiani pisortaq Henrik Lethip erseqqissarpaa.

Qasigiannguani, Ilulissani, Qeqertasuarmi Uumannamilu sulisut qanimut novembarip pingajuaniit arfernata tungaanut naapisimaaqatiginissaat pissaaq. Royal Greenlandip pisortaanera Keld Askær aamma siuliersuisuni siulittasoq Paviaaraq Heilmann avannaani suliffissuarnut angalaassapput.

- Sulisunut pingaarteqaarput uagut aqutsisut qanimut malinnaanerput, suliffeqarfissuarmi susoqarnersoq kissalu Royal Greenlandi nunani allani sutitsinersoq ilisimatitsissutigissallugu, minnerunngitsumillu sulisut suliffimminni suliffigiuminarsaaqataanissaat paasitissallugu, Henrik leth radioaviisimut nassuiaavoq. Taanna aamma oqarpoq sulisut suliassaarunnermi nalaani Royal Greenland Academymik tallugu pikkorissartinneqarsimanerat, kinguneqarluarsimasoq, tamannalu siunissami ingerlaannarnissaa naatsorsuutigisariaqartoq.

Royal Greenlandimi pisortap siulersuisunilu siulittaasup siorna angalagamik TV-mi ilisarisimalluagarput Kaalisaaq ilagaat, tamannalu sulisunut alutorineqarluarpoq nuannarineqarlunilu, neriorsuutigeriikkatullu tikeriartigulu avannaani sulisunut tupaallannartoq.

Nunatsinni ilisarisimaneqalersimasoq nipilersortartoq Danskeq Henning Stærk nipilersoqataalu RG-p siuuttuisa angalaneranni nipilersortoriniarpaa, illoqarfinni tikitaminni tusarnaartitsisassalluni. Henning Stærkilu nunatsinniittareernikuummat tikinnissaminut qilanaarnerarpoq.

Royal Greenlandi sulisuminut ukiumut sisamariarluni naqitanngorlugu nutaarsiassaqartitsisarpoq, tamannalu sulisut akornanni iluarineqartoq pisortap Henrik Lethip malugisimanerarpaa.