Royal Greenland Academy akisuallaaqaaq

Royal Greenlandimi sulisut naalakkersuisunut ilaasortap Siverth K. Heilmannip oqaasiinut tupaallassimaqaat. Sulisut ineriartortinneqarnissaat angujumallugu Royal Greenland Academy-p pikkorissartitsisarnera Siverth K. Heilmannip akisuallaarsoraa sunniutikippaallaarsoralugulu.

- Pikkorissarnermi peqataasimasut nalunaarutigisartagaannut taamatut oqarneq akerliulluinnarpoq, Royal Greenlandimi ilinniartitaanermut pisortaq, Hans Bro oqarpoq.

Royal Greenlandip pikkorissartitsinermini akigititaanik Siverth K. Heilmannip oqaaseqarnera aamma akissutissaqartinneqarpoq:

- Uagut pikkorissartitsisarnigut Namminersornerullutik Oqartussat ilinniarfeqarfiini pikkorissartitsisarnerinit akisunerunngillat, Hans Bro oqarpoq.

Royal Greenland Academyp pikkorissartitsineranut aningaasartuutit Namminersornerullutik Oqartussat, suliffeqarfiup sulisullu kommuniinit akilerneqartarput.

Narsarmi raajaleriffimmi sulisut pikkorissartinneqanngitsoornerat Royal Greenlandimit ajuusaarutigineqarpoq – taqqavani pikkorissartitsisoqanngitsoormat Siverth K. Heilmann Royal Greenland Acadamy pillugu oqaaseqarpoq.

Naalakkersuisunut ilaasortaq illuatungiliuttunit Demokraatinit tapersersorneqanngilaq:

- Sulisut arlaannik peqquteqartumik Royal Greenlandimit soraarsinneqartussat Royal Greenlandimit pikkorissartinneqartarneri maligassiuinertut isigaarput. Siverth K. Heilmannip isornartorsiuinera uagutsinnit tapersersorneqanngilaq Royal Greenlandilu kajumissaarparput sulisorisimasamik artorsarnerini ikiuullutik pikkorissartitsisarnertik ingerlatiinnassagaat, Demokraatit ilinniartitaaneq pillugu oqaaseqartartuutitaat Astrid Fleischer Rex oqarpoq.