Royal Greenland aamma KNAPK: naalakkersuisut inatsisartullu tapersersuinngillat
Raajarniarneq pillugu saqitsaattut – Royal Greenland aamma KNAPK raajat akii pillugit isumaqatigiissinnaanngikkaluarlutik allatigut isumaqatigiissuteqarput. Tassalu nunatsinni aalisarnermik inuussutissarsiuteqarnerup ajornartorsiorfiunerani Naalakkersuisut Inatsisartullu naammattumik tapersersuinnginneraallutik isumaqatigiikkamik.
Kalaallit Nunaanni aalisartut piniartullu Kattuffiata KNAPK-p Royal Greenland-ip fabrikkiinut tunisiumajunnaarmatali ullut sisamat maanna ingerlareersimalerput, mannalu tikillugu illuatungeriit isumaqatigiissuteqarnissaminnut suli qanillinngillat.
- Nunatsinni aalisarnermik inuussutissarsiuteqarnerup ingerlanneqarnissaanut ineriartortinneqarnissaanullu periarfissat akimmisaartinneqartuarput, ilaatigut inuiaqatigiinni akigititaasut nunanut unammisatsinnut sanilliullugu qaffasippallaartinneqarneratigut. Takuinnarsigit nunatsinni uuliap akia aammalu assartuinermut aningaasartuutit, Royal Greenlandip pisortaa Henrik Leth tikkuaavoq.
Politikerinulli kaammattuuteqarneq Naalakkersuisut isorinninnerannik kinguneqarpoq. Aalisarnermut Naalakkersuisoq Finn Karlsen Atassummersoq sapaatip akunnerani matumani Royal Greenland A/S-imut avoqqaarinnippoq:
- Royal Greenlandip kaaviiartitai 5 milliardi koruunit tungaanut annertussuseqarput, taamaammat takujuminaatsippara sooq Royal Greenland A/S aalisartunut 7 millioni koruuninik tunniussiumannginnersoq.
Taamatuttaaq Naalakkersuisut siulittaasuat Qanoruumut ullumi oqarpoq isumaqatigiinniarnernut ajalusooqqasunut Naalakkersuisut arlaannaatigulluunniit akuliukkusunngimmata, ilanngulluguli oqaatigaa Royal Greenland taama annertutigisumik kaaviiaartitaqarluni inuiaqatigiinni aningaasartuutikillisaanermi peqataanerusariaqartoq.
Sinerissap qanittuani aalisarnermi ajornartorsiutit anigorneqarsinnaaqqullugit Naalakkersuisut ukiuni kingullerni tallimani immikkut qinnuteqaatigisartagai Inatsisartut Inatsisartullu Aningaasaqarnermut Ataatsimiititaliaata aningaasaliissutigisariaqartarsimasaat Qanoruumi unnuk manna sammineqassapput.
