Royal Greenland 78 millioni koruuninik amigartooruteqassaaq

Nunatsinni suliffeqarfiit annersaat, Namminersornerullutik Oqartussat pigisaat, aalisakkanik suliffissuaq, Royal Greenland A/S, ukiormanna naatsorsuutiminik amigaartooruteqassaaq. Suliffeqarfissup 78 millionit koruunit amigartoorutigissavai. Amigartoorutit taakkua siorna sinneqartoorutinut 52 millionit koruuniusunut naleqqussarneqassapput.

decembarip 10-at 2008 16:53

Nunatsinni raajartat qaleralittallu ikiliartornerat, kilisaatit pisarisartagaasa ukiukkut sikuuneratigut ikileriarnerat ilaatigullu saarullittassanik ilimagisamit ikinnerusunik tunineqarnerup kingunerinik, suliffeqarfissuup angusai sunnerneqarsimapput. Tamakkua saniatigut Arctic Green Foodip suliffissuinik qulinik tigusineq aamma sunniuteqarsimavoq.

Aammattaarli Polenimi illoqarfimmi Kozalinimi aalisakkanik suliffissuartaap aallartinissarnera, tunisassiornerup akitsoriartornera, aamma nukissiuutinik atuineq amigartoornermut pissutaaqataapput.

Pissutsilli tamakkua suliniutivut aallartereersut unitsinnavianngilaat, tusagassiuutinut nalunaarummi pisortaaneq Flemming Knudsen aamma siulersuisuni siulittaasoq Peter Grønvold Samuelsen allapput. Annertuumik ingerlatat naleqqussarnerisigut, aningaasaliiffissanik pingaarnersiuinikkut, tunisassiornermik pitsanngorsaanikkut sulilluarnerulernikkullu aaqqissuussinertigut kiisalu aningaasartuutinik ilanngarterinikkut, aamma Polenimi suliffissuup aningaasarsiornikkut aappaagu ilapittuutaallualernissaa pitsaasup tungaanut aallariarnissamut naatsorsuutigineqarput.

Royal Greenland 78 millioni koruuninik amigartooruteqassaaq

Aamma atuaruk