Royal Arcticip pisiortornera assuaraat
Umiarsuaaqqat sisamat nunarfinnut angallassisartussat aamma Atlantikoq ikaarlugu umiarsuaq usinik assartuisartoq pisiarineqarput.
Aningaasaqarnermut ataatsimiititaliap ilaasortaasa tamarmiullutik isumaqatigiissutigaat, aningaasarpassuit atorlugit umiarsuarnik pisineq tunngavissaqarpianngitsoq aammalu assartuussineq pillugu aaqqissuussineq taamatullu kisermaassilluni Atlantikoq ikaarlugu usinik assartuineq innarlerneqassasut oqaatigalugu.
Aningaasaqarnermut ataatsimiititaliap ilaasortaasa tamarmiusut pisineq assuarigaluaraat, taamaattoq Naalakkersuisooqatigiit ilaasortaatitaasa pingasuusut pisineq akersaarpaat Siumup ilaasortaatitaasa marluusut tamanna akuersaanngikkaat.
Royal Arctic Bygdeservicep, Namminersorlutik Oqartussanik pigineqartup, umiarsuarnik sisamanik pisinissaa siorna Aningaasanut Inatsimmut ikkunneqarmalli, Aningaasaqarnermut ataatsimiititaliap tamanna eqqarsarnartoqartissimavaa. Umiarsuarnik pisinissaq Aningaasanut Inatsimmut ikkunneqarmap aningaasartuutit 267 millioni koruuniusimasut maanna 535 millioni koruuninut qaffanneqarsimapput. Aningaasat qaffannerannut pissutaavoq Royal Arctic Line umiarsuarmik Atlantikoq ikaarlugu assartuummik aamma piserusuttassimammat.
Naalakkersusiunit naqissuserneqarpoq, inuiaqatigiit aningaasaliissutaasa qulakkiissammassuk Royal Arctic Linep akuersissutaa aammalu piginneqatigiiffiup taassuma nunaqarfinnut sullissinera ukiuni 20-ni qulakkeerneqassammat.
Tassalu taakkorpiaat pissutigalugit Aningaasaqarnermut ataatsimiititaliaq isornartorsiuteqalerpoq. Ataatsimiititaliammi kissaatigigaluarpaa usinik assartuussinermut tunngasut Assartuineq pillugu Isumalioqatigiisitamit nalilersorneqassasut imaluunniit minnerpaamik tamakkuninnga ilisimasaqarluartumik usinik assartuussineq nunatsinnut naleqqulluartoq suunersoq misissorluarneqassasoq, ataatsimiititalialli kissaataa taanna Naalakkersuisunit isumaqatigineqanngilluinnarpoq.
Aningaasaqarnermut ataatsimiititaliamit paasineqarpoq, usinik assartuineq aamma angallasseriaaseq maannakkutut ittut Naalakkersuisunit ingerlatiinnarneqartussaasut, taamatullu siunniussaqarneq inuiaqatigiinnut oqallisissiaasimanngitsoq aammalu immikkut ilisimasalinnit imaluunniit piginneqataasunit nalilersorneqarsimanngitsoq aammalu aalajangikkap maalaarutigineqarnissaanut piginneqataasut periarfissinneqarsimanngitsut ataatsimiititaliamit paasineqarluni. Tassalu taamatut pissusilersorsimannginneq Aningaasaqarnermut ataatsimiititaliap tamarmiusup assuarnartoqartippaa naammaginanngitsustullu oqaatigalugu.
Ataatsimiititaliap isumaqatigiinnera aamma tamaannga killeqarpoq. Naalakkersuisooqatigiit ilaasortaatitaat pingasuusut, Naaja Nathanielsen siuttoralugu isumaqarput, naak piareersarsimanerit aamma misissuinerit naammaginanngikkaluartut aammalu assuarnaraluartut, nunatta pisariaqartitaat, tassalu pilersuineq toqqammavigalugu akuersaartariaqarlutik.
Illuatungiliuttut ilaasortaatitaat marluusut tassalu, Per Berthelsen aamma Akitsinnguaq Olsen, tamarmik Siumumeersut isumaqarput, akisussaassusersermik takutitsinerunngitsoq, pisoq assuarnartoqarteriarlugu isumaqataaneq. Illuatungiliuttut taakku marluk siunnersuutigaat, umiarsuit pigeriikkat atorneqarsinnaajunnaarsimappata, allanik attartorneqarsinnaasunit pissarsiortoqartariaqartoq. Siumumeersut aamma isumaqarput Naalakkersuisut misissuisariaqqartut periarfissanik allanik, misissuinerlu naammassippat Aningaasaqarnermut ataatsimiititaliamut tamanna suliassanngortillugu.
