Royal Arcticip Linep CO2-mik aniatitsitsinini 5 procentinik annikillisissavai

Umiarsuit angallassissutit aalisariutillu katillutik nunatsinni C02-mik aniatitsinerup 40 procentianik aniatitsipput. Imaatigut angallassinerni 2012-inngortinnagu Namminersornerullutik Oqartussat naatsorsuinerminni naatsorsuutigaat C02-mik aniatitsinertik 5 procentimik annikillississinnaallugu. Royal Arctic Linep tusagassiisartuata Jakob Strømip anguniagaq piviusorsiortuunerarpaa.

- Piviusorsiortuuvoq CO2-mik aniatitsinerup Royal Arctic Line-imi 5 procentinik annikillineqarsinnaanera. Umiarsuarnilli nutaanik atugaqalernikkut kisimi anguneqarsinnaanngilaq, allatut eqqarsartariaqarpugut.

Royal Arctic Line mingutsitsinermik annikillileriniaraluarpoq. Piviusunngortissaagaannili pinngortitamik asattuussinerusumik angallannermi eqqarsartoqartariaqalerpoq.

- Issittumi angallatinik immikkut sanaanik C02-mik annikinnerusumik aniatitsisunik sanaartorneq ajornakusoorpoq. Umiarsuit sakkortunerusunik, annerusunillu motoorillit, illoqarfinnilu umiarsualivinnut pulasinnaasunik umiarsualiortitsisariaqarpugut. Ajornaatsuunngilaq, soorunalimi pinngortitamut tunngassuteqartut eqqarsaatigineqareersut, Royal Arctic Line-imi tusagassiisartoq Jakob Strøm nassuiaavoq.

- Umiarsuaatitta ikummatissanik atuinerisa atortorissaarutaat issittumut naleqqussagaappat? Umiarsuit ikummatissaqarfiisa milluaasui taarsertariaqarput. Ingerlaqqitsinnatali ikummatissamik atuineq qanoq annertutiginersoq, aamma sooq taama annertutiginersoq paaseqqaartariaqarparput.

- Apeqqutit ilagaattaaq umiarsuit sukkassusaat. Pilersaarutit eqqorlugit kigaallassimaartarput. Angallannernimi tamani ilisimaneqarpoq kigaannerusumik ingerlasoqartillugu ikummatissaq annikinnerusoq atorneqartarmat.

Royal Arctic Line-imi avammut tusagassisartut pisortaat Jakob Strøm taama nassuiaateqarpoq. Naggasiullugu oqaatigaa Royal Arctic Linep Danmarkimi umiarsuaatileqatigiit peqatigiiffiata pinngortitamik assattuussinerunissamik anguniagaa malikannerlugu ingerlallutik.