Royal Arctic Line Sikuiuitsoq Kujallermi isarukitsut akornanni angalasoq

Kalaallit umiarsuaatileqatigiiffiat ilisimatusartunut pajulluni Sikuiuitsoq Kujallermiippoq. Nuanneqaaq, kranilerisoq, Vittus Berthelsen oqarpoq.

Royal Arctic Line Sikuiuitsoq Kujallermi ilisimatusartunut suliaqaqqammerpoq. Tassanilu ilisimatusartunit atorneqartussanik atortunik assigiinngitsunik containerinillu assartuipput.

Kranilerisoq, Vittus Berthelsen umiarsuarmi ilaavoq.

Assi: Royal Arctic Line. 

- Misigisaq nuanneq, eqqumiillunilu. Nuanneqaaq angalalluni, Vittus Bertheslen KNR-imit radiokkut aallakaatinneqartartumut Nunatta Nipaanut oqarpoq.

- Silaannaa panerpoq, Kalaallit Nunaata silaannaa assigiinnangajakkunarpaa.

Malik Arctica inuttallu Sikuiuitsoq Kujallermut tikikkamik sumiiffimmi najugaqartunit tikilluaqquneqarput.

Umiarsuarmiimmi ilisimatusartut atortorissaarutissaat containerillu sikup qaanut usingiarneranni isarukitsut aggerlutik alapernaapput.

- Isarukitsunik takuvugut taavalu puisit, tikaagulliit tamakkuninga takuvugut. Isarukitsut inequnaqaat takullugit, tupinnarlutillu, Vittus Berthelsen oqarpoq.

Taassuma oqarnera naapertorlugu sikup qaavata eqqaanut talinneq asseqanngitsumik misigisassaavoq.

- Nunamik takusaqarnatalu, sikuinnaavoq.

RAL-ip misilittagaqarnera pissutigalugu toqqarneqartoq

Royal Arctic Linep umiarsuaata Malik Arctica Sikuiuitsoq Kujallermut angalanissamut suliakkinneqartuuvoq.

Soorli Royal Arctic Linep umiarsuaa Sikuiuitsoq Kujallermukarpa?

Royal Arctic Linep attaveqatigiinnermut pisortaata, Ann-Britta A. Olsvigip oqarnera naapertorlugu tamanna umiarsuaatileqatigiiffiup angalaffigisartagaanut naleqqunnera pissutaavoq.

- Umiarsuaatileqatigiiffiup piffissap ilaani ulapiffiginngisaani aningaasaqarnermut tapertaavoq.

- Royal Arctic Linep ukiuunerani uninngaannarnissaa taamaalilluni pinngitsoortinneqarpoq. Umiarsuaq nunatsinni umiarsualiit maanna matoqqasut avannginnerani uteqqinnissamut piffissaqarluarpoq.

Suliassaq taamaattoq, Royal Arctic Linep siusinnerusukkut aamma suliarereernikuugaa, taanna oqarpoq.

- Royal Arctic Line norgemiut, tyskit belgiamiullu naalagaaffianni peqatigiiffinnut suliassanik taamaattunik ukiuuneri 13-it suliaqartarpoq.

Sikuiuitsoq Kujallermut nerisassanik, uuliamik, atortorissaarutinik maskiinanik allanillu ilisimatusarfimmut assartuisoqartarpoq.

- Ukioq tamaat nutaamik pilersuisoqannginnerani ukiinissamut pisariaqartut tamarmik. Uanilu aatsaat siullermeerluta ilisimatusartunik silap pissusianik imaanilu avatangiisinik ilisimatusartunik aamma ilaasoqarpugut.

Royal Arctic Linep nunatsinni misilittagaqarluarnera suliassammut tassunga aamma naleqqunneranut pissutaasoq, attaveqatigiinnermut pisortaq oqarpoq.

- Royal Arctic Linep nunatsinni imaatigut angallanneq minnerunngitsumik avannaata kangiani assartuineq nalinginnaasumik ingerlavissaanngitsuni soorlu Sikuiuitsoq Kujallermut pilersuinermik kiffartuussineq misilittagaqarfigingaatsiarpaa. 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat