Royal Arctic Line naleqqusaallaqqissoq
Avannaani immap sikusarnerata allanngornera allaavigalugu naalakkersuisut Royal Arctic Linemut piumasarilerpaat umiarsuit nassiussanik assartuutit illoqarfiit pajuttuiffigineqartut akulikinnerusumik tikinneqartalernissaat. Nassiussassaqarluartillugu aatsaat taamaaliortoqarsinnaasoq Royal Arctic Linep pisortaa Jens Andersen oqarpoq.
Royal Arctic Linep ippassaq ataatsimeersuarmat piginnittut sinnerlugit angallannermut naalakkersuisoq Jens Napaattooq ilaatigut oqarpoq Royal Arctic Linep nunatsinni pissutsinut naleqqusaallaqqissusia nersualaartariaqartoq, pingortitamili pissutsit allanngorsimatillugit suli naleqqusaasoqaqqissinnaasoq Jens Napaattooq isumaqarpoq.
- Avannaani tunumilu umiarsuit akulikinnerusumik tikittalernissaat aaqqiiffigineqartariaqarpoq, Islandillu tunumut pilersuilernissaa misissuifigineqarluni, Angallannermut naalakkersuisoq Jens Napaattooq oqarpoq.
Naalakkersuisunut akissuteqarluni Royal Arctic Linep pisortaa Jens Andersen oqarpoq umiarsuit angalanissaasa pilersaarusiat sinnerlugit assartuisareerlutik. Assersuutigaalu Ilulissat umiarsuarnik tikinneqartarnera ukiuni kingullerni pingasuni juullip tungaanut ilaatigullu januaarimi pisartoq. Jens Andersen aamma oqarpoq avannaani sikusarnera arajutsinaveersaarluartarlugu, sikulersimassagaluarpammi nassiussat timmisartukkut oqqunneqartariaqartaramik. Naak ukioq kaajallallugu angalanissanik pilersaarusiortoqartaraluartoq qanoq ilinerani sikunissaa ilisimaneq ajoramikku, mianersortoqartariaqarneq pisariaqartippaa, umiarsuarmi umiarsualivimmiinnera 70.000 koruunit angullugit akeqarsinnaasarmat.
Tunumut nassiussanik angallassineq Jens Andersenip Royal Arctic Linemut akisunerarpaa, iluanaarnannginnerarlugulu, tulluartuutippaalu Islandiminngaanniit Tasiilaq Illoqqortoormiullu kiffartuunneqartalertuuppata, naalakkersuisulligooq tamanna aalajangertariaqaraat Royal Arctic Linep pisortaa Jens Andersen oqarpoq.
Royal Arctic Linep ippassaq ataatsimeersuarnerani siulersuisuni suliffiutilik Svend Junge, Danske Bankimilu pisortaasimasoq John Rammer ilaasortaajunnaarput. Nutaatullu ilaasortanngorput umiarsuaatileqatigiiffimmi J. Lauritzenimi siulittaasoq Bent Østergaard aamma Team Grønlandip allaffeqarfiani pisortaq Claus Nielsen.
