Royal Arctic Line ataatsimeersuarpoq siulittaasortaarlunilu
Umiarsuaatileqatigiiffik Royal Arctic Line ippassaq ataatsimeersuarpoq. Ataatsimeersuarneq Angallannermut Naalakkersuisumit Jørgen Wæver Johansenimit peqataaffigineqarluni ingerlanneqarpoq. Siulersuisut nutaamik siulittaasortaarput. Ukiumi ataatsimi tuilliuttumi siulittaasunngorallartoq tassaavoq Royal Arctic Linemi tuniniaanermut pisortaq Jette Larsen. Siulittaasunngortup suummita sulissutiginiarpai?
- Umiarsualivinnik alliliinerit kiisalu nunatta Danmarkimi umiarsualiveqarfeqarneranut tunngasut, umiarsualiveqarfik Aalborgimiiginnassanersoq imaluunniit allanut nuunneqassanersoq, tamakku annerusumik samminissaat naatsorsuutigaara. Umiarsualivinnik allilerinissaq pisariaqaleriartorpoq, nunatsinni nassiussat amerliartuinnarmata, Jette Larsen oqarpoq.
Nuup umiarsualivianik allilerinisoqarnissaanut Namminersornerullutik Oqartussat kommunelu aalajangiisussaapput. Umiarsualiviullu imarpik ikaarlugu assartuutinut umiarsualiviutigisup allineqarnissaanut kikkut akiliissanersut Jette Larsenip aamma apeqqutaanerarpaa.
Umiarsualiviup allineqarnissaanut oqartussat imaluunniit atuisut akiliissappat, tamatuminnga angallannermut naalakkersuisoq Jørgen Wæver Johansen aperineqarami akivoq, nunatsinni umiarsualiveqarfinnik allilerinissaq Naalakkersuisunit pingaartinneqarmat umiarsualivinnik iluarsartuussinissamut pilersaarusiaq manna naammassineqalersoq Inatsisartut massakkut upernaakkut ataatsimiinneranni saqqummiunneqarniartoq. Iluarsartuussinissamut aningaasartuutissat aningaasanut inatsisissami taamaalillutik ilaatinneqarumaartut Jørgen Wæver Johansen oqarpoq.
Umiarsualivinnik iluarsartuussinissami Nuummi umiarsualivik siulliunneqarniarpoq, taava Sisimiuni, Ilulissani, Uummannami kiisalu kujataani umiarsualiviit tullinguunneqassallutik.
Royal Arctic Linep siulersuisuini siulittaasunngortup Jette Larsenip taarserpaa, umiarsuaatileqatigiiffiup siulersuisuini 1993-imiilli ilaasortaasimasoq Jørgen Ancher Høj.
