Royal Arctic Line 10 millioni koruuninik sipaarniartariaqalerpoq
- Nioqqutissat angallannerannut isertitat missingersuutinit 18 millioni koruuninik ikinnerupput, taamaammat 2009-p sinnerani 10 millioni koruuninik sipaartariaqassaagut, iliuusissatsinnik nassaarsiorpugut, Royal Arctic Line-imi pisortaaneq, Jens Andersen, allakkani Royal Arctic Line-ip iluani paasissutissiissutini, Sermitsiap pissarsiarisimasaani, taama issuarneqarpoq.
juulip 31-at 2009 05:46
Suleqatigiinnut naalagaasat aningaasaqarnermut akisussaaffillit akisussaaffimminnik sukumiisumik misissueqqissaarnissaannik piumaffigineqarput. Sipaarniarnissamut siunnersuutit tamarmik aningaasaqarnermut immikkoortortarfimmit aqutsisunillu kingorna katersorneqassapput, siunnersuutillu ataasiakkaat pingaarnersiorlugit tulleriiaarneqassallutik.
- Suut sipaarfigineqassanersut suli oqaatigiuminaapput, 10 millioni koruunilli sipaassagutsigik aningaasartuutit tamaasa misissorluaqqissaartariaqarpavut, Jens Andersen oqarpoq.
Royal Arctic Line-imi pisortaanerup sulisut tamaasa sipaarniutissat pillugit suleqatigiilluaqqullugit kajumissaarpai, sulisullu ataasiakkaat ulluinnarni sulinerisa nuanniitsumik eqqorneqarnissaat pinaveersaaqquvaa.
