Rossen: Thulemi saleeqataasut misissorneqassappat

Kalaallit Folketingimut ilaasortaatitaata aappaata, Sofia Rossenip Pituffimmi sulisartuusimasut peqqissusaannik misissuisoqassanersoq ministeriunermut Anders Fogh Rasmussenimut apeqqutigaa.

Amerikamiut timmisartuata atombombemik usisup Pituffiup eqqaani 1968-imi nakkarnerata kingornagut sulisartut saleeqataasimasut peqqissusaasa ataavartumik misissuiffigineqartarnissaat danskit naalakkersuisuisa aallartinniarpaat?

Sofia Rossenip IA sinnerlugu sinniisutut Folketingimi ilaasortaasup ministeriuneq qanoq iliuuseqarniarnersoq, paragraf 20 naapertorlugu apeqquteqarfigaa.

Sofia Rossen isumaqarpoq inuit saleeqataasimasut, danskit kalaallillu, peqqissusaasa ataavartumik misissuiffigineqartarnissaat qulakkeerneqartariaqartoq. Inuit pineqartut taakkua aamma tamakkiisumik paasisariaqaraluarpaat misissuisimanerit nalunaarutillu timmisartup nakkarneranut tunngasut qanoq paasissutissanik allassimasoqarnersut aammalu qinngornerit ulorianartut radioaktiviusut qanoq kinguneqarsinnaanersut, taama piumasaqarpoq, Sofia Rossen.

Sapaatip-akunnerata siuliani Danmarki EU-p parlamentianiit sakkortuumik avoqqaarineqarpoq, qallunaat oqartussaatitaasa inunnik sullissisimanerat pillugu uparuartorneqaramik, inuit pineqartut taamanikkut Pituffiup eqqaani Narsaarsummi saleeqataasimapput. Taasinermi 544-t akuersipput,

29-it akerliusut, nalunaarummi Qallunaat Kunngeqarfiat uparuartorneqaqisoq EU-p parlamentiata, EU-mi atomi pillugu isumaqatigiissummi pisussaaffini tamaasa naammassisimanerai apeqquserneqarpoq.

Radioaviisip peqqissutsimut ministeri Lars Løkke Rasmussen, EU-p qallunaat naalakkersuisuinut avoqqaarinnissimaneranik oqaaseqartinniarsimagaluarpaa. Tamannali iluatsissimanngilaq. Ministeriunerup sapaatit-akunneri marluk qaangiutsinnagit Sofia Rossen-ip apeqquteqaatai akissuteqarfigisussaavai.