Roskildep Nunarput qaamasumik isigineqartikkusuppaa

Kalaallit Nunaannut asissuinerit Danmarkimi illoqarfiup Roskilde-p taamaatitikkusuppai.
decembarip 08-at 2010 07:26

Tusaamanerluutit illuatungilerlugit Kalaallit Nunaannut tunngassutilinnik aappaagu apriili tamaat sammisaqartitsiniarpoq. Roskilde-mi aviisimi tamanna allaaserineqarpoq.

- Kalaallit Nunaat pillugu tusagassiuutitigut tusarliunneqartartut nuanniitsut killormut saatikkusuppavut, soorlu politikerit akornanni kammalaatersorneq, kiisalu meeqqanik sumiginnaaneq. Kalaallit Nunaanni allarpassuarnik soqarpoq, Alf Tornberg Nanortallip illoqarfittut ikinngutaani Roskilde-meersoq oqarpoq.

Sorpassuit suli inissitassaapput, Julie Berthelsenili Roskilde-p kommuneata erinarsortikkusuppaa, Kunngissaq aamma qaaqquneqassalluni. Kalaallit Nunaat pillugu tusarnaartitsisoqassaaq, saqqummersitsisoqassalluni oqalugiartoqassallunilu.

Lions Club suleqatigalugu meeqqanut suliniaqatigiiffimmut Nanu-mut aningaasanik katersuiniartoqassaaq. Kommunemi piorsarsimassutsimut siunnersortip, Marie Berthelsenip, oqarnera naapertorlugu, Roskilde-mi piffissap sivisoorujussuup ingerlanerani aatsaat taama annertutigisumik aaqqissuussisoqassaaq, aaqqissuussinermullu 100.000 koruuninit atorneqassapput.

Kalaallit Nunaat pillugu sammisaqartitsineq Inuit Nu-mik taaguuserneqarpoq.