Roskildemi saqqummersitsinersuaqassaaq
Roskildip Kommuneata ullumi saqqummiuppaa Danmarkimi Kalaallit Nunaat pillugu saqqummersitsinissanut pilersaarut. Pilersaarut kommunemi piorsarsimassutsikkut ataqatigiissaarisup aaqqissuinermilu akisussaasuusup, Marie Berthelsenip aaqqissuussinerit taamatut aaqqissuussinerit annersarigunaraat oqaatigaa.
- Taama annertutigisumik siusinnerusukkut aaqqissuussisoqarnikuunngilaq. Suliffeqarfiiit allallu suleqataasut 45-pput, apriilimi pisussanik 58-inik pilersaarusiortut, Marie Berthelsen oqarpoq.
Roskilde Nanortalillu illoqarfittut ikinngutigiipput. Inuit Nu-mik pilersaarut pinngorpoq Alf Tornberg, illoqarfiit Roskildip Nanortallillu ikinngutigiittut peqatigiiffianeersoq aamma Marie Berthelsen kujataani naapimmata. Pilersaarummilu qitiutinneqarpoq Kalaallit Nunaata qallunaanut pitsaanerusumik saqqummiunneqarnissaa.
Pingaarpaajuvoq tusagassiuutit sammisaasa saniatigut Kalaallit Nunaat pillugu takutitaqarnissaq. Nunami ikinngutigisatsinniit takutinneqassaaq pitsaassuseq inuillu nukittulluinnartut. Kalaallit Nunaat Namminersulernikuuvoq, taamaattumik isumaqarpunga pingaaruteqartoq ukiorpassuarni ataqatigiinnerput piujuartinneqartariaqartoq, Marie Berthelsen oqarpoq.
Pilersaarut assigiinngitsunik 58-inik imaqartoq piorsarsimassutsikkut aaqqissuussineruvoq annertooq sammineqassallutik soorlu, oqalugiartitsinerit, tusarnaartitsinerit, filmertitsineritm saqqummersitsinerit, naalagiaqatigiinneq aamma inuussutissarsiutit pillugit isumasioqatigiissitsineq.
Ilaatigut nipilersortorineqassapput Rasmus Lyberth, Nive Nielsen, Pele Møller aamma Aviaja Lumholt. Filmit Nuummioq aamma Eksperimentet takutinneqassapputtaaq. Eqqumiitsuliortoq Julie Edel Hardenberg saqqummersitsissaaq, soorluttaaq oqalugiartoqartassasoq, soorlu Erik Aappalaartoq, qilaatersorneq asimilu assilisat pillugit. Marie Berthelsenilli qallunaat Kalaallit Nunaat pillugu qatsussinissaat ernumassutiginngilaa.
- Isumaqanngilanga qatsussissasut, akerlianilli qularutiginngilara suli annerusumik takorusussasut, Marie Berthelsen oqarpoq.
Roskildip Kommuneanit pilersaarusiortut suleqatigineqartut 45-t ilagaat tassaapput Vikingemuseet, Roskildemi atuakkanik atorniartarfiit allarpassuillu.
