Roskildemi Kalaallit Nunaannik nittartaassaneq soqutigineqarluarpoq
Birgit Pedersen, Roskildep Kommuniani kommunalbestyrelsimi kulturikkut ataatsimiititaliami siulittaasoq nuannaaqaaq.
- Isumaqarpunga Roskildemi innuttaasut amerlanerpaat qularnaatsumik paasereeraat Kalaallit Nunaat pillugu taamatut aaqqissuussisimanerput, tassami maannakkumut aaqqissuussinerit tamarmik ajunngilluinnartumik ingerlammata.
Birgit Pedersen isumaqarpoq aaqqissuussineq Inuit Nu, qaammatip ataatsip missaani sivisussuseqarnera, assigiinngitsunillu qinigassaqarnera innuttaasunut soqutiginninnerulersitsisoq.
- Amerlanertigut kommuunit aaqqissuussigaangamik ulloq ataaseq marlulluunniit atortarpaat, taamaalillutik inuppassuit takuniaanissaminnut periarfissaqarneq ajorput. Maannakkulli sammineqartumi Kalaallit Nunaat Roskildemut attuumalluinnarpoq, tamannalu inuit soqutigaat.
Kalaallit Nunaat aammalu Kalaallit Nunaannut tunngassuteqartut qallunaanit soqutigineqarnerat ornigarneqarluartarnerallu malunnarpoq.
- Kalaallit rådhusimut orniguttartut takusarpakka, isumaqarpungali Roskildemi innuttaasut qallunaat qaammammi uani pisut assigiinngitsut malinnaaffigissalugit soquginerugaat, Birgit Pedersen oqarpoq.
