Roskildefestivalimi inuit sialuutaritipput
Roskildefestivalimukartussaqarpat mianersoqqussutissaqarpugut:
Festivalerfimmi marullussuarmik ulikkaarpoq, kummeqarlutillu festivaleriaruit pitsaanerussannguatsiarpoq.
Tassa singernerit qummut qaangerlugit marulloqarpoq. Unnuaq siallersimaqaaq, tammaarfillu maanna marulluinnanngorsimalluni.
Roskildemi politiit taama nalunaaruteqarput.
- Pitsaavallaanngilaq, ajornerusumilli siornatigut takusaqarnikuuvunga. Inuit 45.000-it festivalerfissamut takkutereerput, nunalu tukkaanneqaqimmat marulluinnanngorsimavoq, politeeq Roskilde-meersoq, festivalerfimmilu nakkutilliisoq oqarpoq.
Silassaq pitsaavallaanngilaq, tassa festivalertussat sialuutaritinniarunarmata. Sapaatiuppat aatsaat panernarsinissaa Danmarkimi silasiortut ilimasaarutigaat, festivalilu ulloq taanna naammassineqassaaq.